Күдікті терезені сындыру арқылы ұрлық жасаған
Алматы қалалық Полиция департаменті тұрғындардың көлігін тонаумен айналысқан азаматты ұстағандарын мәлімдеді, деп хабарлайды Almaty-akshamy.kz.
ҚР ҚК-нің 188-бабы 3-бөлігінің 2,3-тармағында (ұрлық, яғни бөтеннің мүлкін бірнеше рет жасырын жымқыру) көзделген қылмыстық құқық бұзушылықты жасады деген күдікпен 2000 жылы туған М.есімді азамат ұсталды.
«Күдікті терезені сындыру арқылы ұрлық жасаған. Ол көліктің салонынан құндылығы бар заттың барлығын алып кеткен. Сотқа дейінгі тергеу барысында күдікті заңсыз баю мақсатында тұрғын үйлердің аулаларында тұрған көліктерден ұрлық жасағандығы анықталды. Қазіргі уақытта тергеу жоғарыда аталған адамның алты қылмысқа қатысы барын анықтады», - деді, Әуезов аудандық полиция Басқармасының бастығы, полиция подполковнигі Ұлан Әбілқайыр.
Тергеу барысында күдікті уақытша ұстау изоляторына қамалды. Оның жеке басы қалада бұрын жасалған осындай қылмыстарға қатысы бар-жоғына тексерілетін болады.