Алматының Бостандық ауданы әкімдігінде қаланың Атмосфералық ауаны қорғау қағидаларын іске асыру аясында шағын және орта бизнес өкілдерімен кезекті ақпараттық-түсіндіру кездесуі өтті, – деп хабарлайды aqshamnews.kz тілшісі.
«Eco Almaty» ЖШС мамандары кәсіпкерлерге жаңа экологиялық талаптар, газдандырылған аудандарда қатты отыннан кезең-кезеңімен бас тарту, шығарындыларды тазарту жүйелерін орнату қажеттілігі, сондай-ақ төмен эмиссиялы аймақтың (LEZ) пилоттық жобасын іске асыру жөнінде түсіндіру жұмыстарын жүргізді.
Кездесу барысында Бостандық ауданындағы экологиялық ахуалға ерекше назар аударылды. Бүгінде экологтар тексерген нысандардың үштен біріне жуығы әлі де қатты отынды пайдаланып келеді. Оның ішінде 52 қоғамдық тамақтану орны, 8 монша кешені және 1 автосервис бар. Жалпы ауданда шағын және орта бизнеске тиесілі 202 нысан тексерілді. Оның ішінде 62 автосервис, 103 қоғамдық тамақтану орны және 37 монша кешені қамтылды.
Аталған нысандардан атмосфераға жыл сайын 617 тоннадан астам ластаушы заттар шығарылады. Бұл деректер кәсіпкерлермен алдағы түсіндіру жұмыстарын жүргізуге негіз болды.