Қазақстанда бағдарлама Astana Hub-пен бірлесіп өткізіледі, деп хабарлайды aqshamnews.kz тілшісі.
Almaty Hub-та стартаптар мен шағын және орта бизнеске арналған халықаралық Small Business Growth Academy білім беру бағдарламасы басталады. Жобаны ҚР Жасанды интеллект және цифрлық даму министрлігі, Astana Hub және Meta Алматы қаласы әкімдігінің қолдауымен жүзеге асырады. Бұл туралы Алматы қаласы Цифрландыру басқармасының өкілдері хабарлады.
Бағдарлама бизнесті ілгерілету, клиенттермен жұмыс істеу және кәсіпті дамыту үшін цифрлық құралдар мен жасанды интеллект мүмкіндіктерін пайдаланғысы келетін кәсіпкерлерге арналған.
Алдағы айларда Алматыда бес практикалық воркшоп өтеді. Қатысушылар жарнаманы баптауды, Facebook, Instagram және WhatsApp платформаларымен жұмыс істеуді, AI көмегімен контент жасауды, жаңа аудитория тартуды және клиенттермен байланысты автоматтандыруды үйренеді.
Алғашқы воркшоп 28 қыркүйекте сағат 10:00-ден 12:00-ге дейін Almaty Hub-та өтеді. Онда Meta платформаларындағы жарнама, Reels және Threads форматтары, маркетингте AI қолдану және компаниялардың практикалық кейстері қарастырылады.
Small Business Growth Academy бағдарламасын Meta Азия-Тынық мұхиты өңірінің 12 елінде жүзеге асырады. Қазақстанда бағдарлама Astana Hub-пен бірлесіп өткізіледі, ал практикалық сессияларды Meta-ның жергілікті серіктесі — CoobX ұйымдастырады.