Қазіргі уақытта күдікті екі эпизод бойынша өз ісін мойындады.
Алматыда полицейлер көліктен ұрлық жасады деген күдікпен 32 жасар азаматты ұстады, деп хабарлайды Almaty-akshamy.kz.
Ішкі істер министрлігінің ресми сайтындағы мәлімет бойынша, К.есімді азамат бұрын көлік тонағаны үшін қылмыстық жауапкершілікке тартылған.
«Бұл жолы ол “Митсубиси Делика” автокөлігінің құлпын ашып, салонына кіріп, ноутбукты ұрлаған. Жеңіл ақша әуесқойының қылмыстық әрекеттері бейнебақылау камераларына түсіп қалған. Біз күдіктінің ізіне түстік және оны ұстадық. Ер адамның қаланың орталық бөлігінде жұмыс жасағаны анықталды. Өзіне қолайлы көлік іздеген ол жүргізушінің кетуін күтіп, қолда бар құралмен құлыпты ашып, қолына түскен құнды заттарды ұрлады. Қазіргі уақытта күдікті екі эпизод бойынша өз ісін мойындады. Оның басқа қылмыстарға қатыстылығы тексерілуде», – дейді Алмалы аудандық полиция басқармасының бастығы Есен Ысқақов.
Полиция сонымен қатар, сотқа дейінгі тергеу ҚР ҚК-нің 188-бабы 3-бөлімі бойынша жасалған қылмысқа сәйкес жүргізілетінін атап өтті.