Алматының Өңірлік коммуникациялар қызметінің алаңында Алматы қаласының Білім басқармасының басшысы Сайран Сайфеденов «Жайлы мектеп» ұлттық жобасын іске асыру аясында қалада 36,8 мың орынға шақталған 22 мектеп салу жоспарланғанын айтты, деп хабарлайды aqshamnews.kz.
Ағымдағы жылдың соңына дейін 32,8 мың орындық 20 мектептің құрылысын аяқтап, пайдалануға беру жоспарлануда. 4 мың орынға есептелген қалған екі мектеп 2025 жылы аяқталып, ашылады.
«Samruk-Kazyna Construction» АҚ арқылы жүргізіліп жатқан 23 100 орындық 13 мектептің құрылысына ерекше назар аударылады. Олардың ішінде 2024 жылдың 1 қыркүйегіне дейін «Dial-Stroy» шағын ауданында 600 орындық мектеп пайдалануға беріледі. 2024 жылдың қазан айында «Теректі» шағын ауданында 2000 орындық мектеп ашу жоспарлануда», - деді басқарма басшысы.
2024 жылдың қарашасында 4500 орындық үш мектеп: Розыбакиев-Левитан көшесі бойындағы мектеп, Райымбек даңғылы бойындағы «Нұрлы Дала» ТК ауданындағы және Ақбұлақ шағын ауданындағы № 154 мектеп құрылыстары аяқталады деп күтілуде.
2024 жылдың соңына дейін 15 мың орындық 8 мектептің құрылыс аяқтау жоспарлануда. Олардың арасында «Қарасу», «Самғау», «Шұғыла», «Құрамыс» шағын аудандары, сонымен қатар, Егізбаев, Сәбденов көшелеріндегі және басқалары бар.
Сонымен қатар, 11 700 орынға есептелген 8 мектеп құрылысын жеке инвесторлар жүргізуде. Бүгінгі таңда Шұғыла шағын ауданында 1200 орындық бір мектептің құрылысы аяқталды. «Алғабас» шағын ауданында 2 мың орындық мектеп салу мемлекеттік жекеше әріптестік шеңберінде жоспарлануда, бұл жоба бойынша жұмыстар 2024 жылдың қазан айында басталады. Құрылыс 2025 жылдың желтоқсанында аяқталады деп күтілуде.
Ағымдағы жөндеу аясында, 2024 жылы 180 мемлекеттік мектепке жөндеу жұмыстарын жасау жоспарланған. Ағымдағы жылдың 19 тамызындағы жағдай бойынша 169 мектепте жөндеу жұмыстары аяқталды, қалған 11 мектепте жөндеу жұмыстарын 25 тамызға дейін аяқтау жоспарлануда.
«Қазіргі таңда қаладағы 13 мемлекеттік мектепте күрделі жөндеу жұмыстары жүргізілуде. Оның ішінде 4 мектепте жөндеу жұмыстары аяқталды, ал қалғандарында 2025 жылы аяқтау жоспарланған. Өкінішке қарай, үш проблемалық нысан бар, онда жұмыстар кешіктіріліп, жөндеу жұмыстары жоспарланған мерзімнен кейін аяқталады деп күтілуде. Олардың ішінде 2023 жылдың ақпан айында басталған №9 мектеп және 2023 жылдың қыркүйегінде реконструкция басталған №59 мектеп бар» - деп атап өтті С.Сайфеденов.
Сондай-ақ, жергілікті бюджет есебінен әрқайсысы 550 орындық екі мектептің құрылысы жүргізілуде. Олардың бірін 2024 жылдың қыркүйек айының соңына қарай «Саялы-2» шағын ауданында аяқтау жоспарлануда. Екінші мектеп «Зерделі» шағын ауданында салынуда.