«Динамо» стадионында «Нашақорлыққа жол жоқ» ұранымен өткен есірткі жарнамаларын жою акциясына мыңға жуық адам қатысты. Ішкі істер органдарының қызметкерлерімен қатар прокуратура, әскери полиция қызметкерлері, С.Ж. Асфендияров атындағы ҚазҰМУ студенттері, Еріктілер лигасының мүшелері және қала тұрғындары да акцияға атсалысты.
– Ауқымды акция Президенттің тапсырмаларын орындау және 2023–2025 жылдарға арналған нашақорлық пен есірткі бизнесіне қарсы күрес жөніндегі кешенді жоспарды іске асыру аясында өткізілуде. Жыл басынан бері Алматыда полиция қызметкерлерінің күшімен есірткі, психотроптық заттар және олардың аналогтарын насихаттайтын бес мыңнан астам хабарламалар (есірткі граффити) боялып жойылды, – деді Алматы қаласы Полиция департаментінің есірткі қылмысына қарсы күрес басқармасының аса маңызды істер жөніндегі аға жедел уәкілі, полиция подполковнигі Дәурен Көбеев.
Оның айтуынша, есірткі жарнамасына телеграм-сілтемелер, QR-кодтар, сондай-ақ аптасына 500 мыңнан 1,5 миллион теңгеге дейінгі жоғары жалақы уәде ететін күдікті хабарландырулар жатады.
Қазақстан Республикасының Қылмыстық кодексінің 299-бабына сәйкес, есірткі құралдарын насихаттау/жарнамалау алты жылға дейін бас бостандығынан айыру жазасына кесіледі.
Алматылық студент Ринат Рахымжанов осындай акцияларға бірнеше рет қатысқан.
– Есірткіге қарсы күреске өз үлесімді қосқаныма қуаныштымын. Өзім салауатты өмір салтын қолдаймын және барлық адамдарды соған шақырамын, – деп атап өтті белсенді.