«Қауіпсіз жол» жедел-профилактикалық іс-шарасы аясында Алматы қаласының әкімшілік полиция қызметкерлері жолаушылар тасымалымен айналысатын автокөлік кәсіпорындарын тексеруде, деп хабарлайды aqshamnews.kz
Тексеру барысында полицейлер жүргізушілерді желіге жіберу тәртібіне ерекше назар аударды. Атап айтқанда, сапар алдындағы бағыттардың нақты белгіленуі, міндетті медициналық тексерулердің өтуі, көліктің техникалық жағдайы мен қауіпсіздік жүйелерінің жарамдылығы, сондай-ақ жолаушыларды тасымалдау құқығын растайтын құжаттар мұқият тексерілді.
Алматы қалалық ПД әкімшілік полиция басқармасы бастығының орынбасары Дархан Айымбетовтің айтуынша, мұндай шаралар жол-көлік оқиғаларының алдын алып, жолаушылардың қауіпсіздігін қамтамасыз етуге мүмкіндік береді.
— Жолаушылардың қауіпсіздігі — жүргізушілер үшін де, тасымалдаушылар үшін де басты басымдық болуы тиіс. Біз тек құжаттарды тексеріп қоймай, әрбір қоғамдық көліктің жолға заңға сай шығуын қадағалаймыз. Бұл – формальдылық емес, бұл – адам өмірінің қауіпсіздігі, – деді Дархан Айымбетов.