Алматы қаласының әкімі Ерболат Досаев Түркісіб ауданының тұрғындарымен кездесу барысында жол және көлік инфрақұрылымын дамыту бағытында атқарылып жатқан жұмыстарға тоқталды, деп хабарлайды Aqshamnews.kz
Биылғы жылы Алматыда 39,6 шақырым жол жөнделді, ал 2025 жылы тағы 51 шақырым жолды жөндеу жоспарланып отыр. Қала әкімінің айтуынша, бұл жұмыстар әсіресе шағын аудандар мен тұрғын алаптардың жол жағдайын жақсартуға бағытталған.
- Әлмерек және Қайрат шағын аудандарында ұзындығы 13 км жаңа жол салынды.
- Жас Қанат шағын ауданында 3,5 км жол құрылысын бастау көзделген.
- Ержанов көшесінің бойында көпір салу және Хмельницкий көшесін ұзартып қосу жобасы да жоспарда бар.
Бұл жобалар қала ішіндегі көлік қозғалысын жеңілдетіп, тұрғындардың күнделікті өмір сапасын арттыруға бағытталған.
Алматы қаласының әкімдігі жол инфрақұрылымын жаңғырту және жаңа көлік бағыттарын дамыту арқылы қаланың барлық аудандарын тиімді байланыстыруға күш салып отыр. Қала әкімі Ерболат Досаев атап өткендей, мұндай ірі жобалар тек орталықта ғана емес, шеткі шағын аудандарда да жүйелі түрде жүзеге асуда.