Қаланың мониторингтік топтары өткен аптада 13 заңды тұлғаға қатысты хаттама толтырды
Алматыда түн ортасына дейін Ashyq қосымшасынсыз жасырын жұмыс істеген кәсіпкерлік нысаны анықталды, деп хабарлайды Almaty-akshamy.kz Almaty.tv-ға сілтеме жасап.
Медеу ауданының мониторингтік тобы әдеттегідей тексеріске шығып, Сәтпаев көшесінің бойында орналасқан түнгі бардың үстінен түсті. Мекеме сағат тілі түнгі сағат 00.00-ден асса да, жұмысын тоқтатпай, келушілерді шамадан тыс артық қабылдаған. Тіпті, мұнда қорқор да шегіліпті.
«Құрметті кәсіпкерлер, карантин талаптарын бұзбай, санитарлық нормаларды сақтап жұмыс істеңіздер. Қауіпті індеттің беті әлі де қайта қойған жоқ. Адамдардың денсаулығымен ойнамай, жауапкершілікпен қарайық», – деді Медеу аудандық Nur Otan партиясының өкілі Нұржан Ердембеков.
Тексеруші топ өкілдері көп ұзамай Төле би көшесінің бойында орналасқан дәмхананың да жұмысын әшкереледі. Кәсіпкерлік нысан осы уақытқа дейін Ashyq-қа қосылмай, түн ортасына дейін жасырын жұмыс істеп келген. Бас санитардың қаулысына сәйкес, мобилді қосымшасы жоқ мекемелер кешкі 21.00-ге дейін ғана адам қабылдай алады. Кейін мамандар анықталған фактілер бойынша кафе иесі мен келушілерге хаттама толтырды.
«Медеу ауданында 4 мониторингтік топ жұмыс істейді. Олар күні-түні тексеріс жүргізіп, барлық мекемені бақылауда ұстап отыр. Әсіресе, бетперде режимі, әлеуметтік арақашықтық, мерекелік жиындарда санитарлық талаптардың сақталуы қатаң тексеріледі», – деді Медеу аудандық кәсіпкерлікті және өнеркәсіпті дамыту бөлімінің бас маманы Арман Сапаров.
Айта кетейік, Медеу аудандық мониторингтік топтары соңғы аптада 300-ден астам мекемеде тексеріс жүргізіп, 13 заңды тұлғаға хаттама толтырған.