Алматыдағы жаңа комьюнити-орталық жылына 100 мыңнан астам жасқа қызмет көрсетеді
Алматы әкімі Ерболат Досаев Әуезов ауданының Мамыр-1 шағын ауданында жаңа комьюнити орталық ашты. Бұл ауданда 14 жастан 35 жасқа дейінгі 102 мың жас тұрады, оның 7,8%-ы NEET жастар. Комьюнити орталық жастардың шығармашылық бастамаларын дамыту мен оларды қызығушылығы бойынша біріктіретін идея алмасу алаңына айналады.
Комьюнити орталық дамыту жөніндегі жоба – Қазақстандағы жалғыз жоба. Бұл үшін Алматы әкімдігі 2023 жылы ғимараттар сатып алып, жөндеген. Келесі аптада тағы 7 орталық ашылады. 8 комьюнити орталық жылына 800 мыңнан астам жасқа қызмет көрсетеді. Орталықтардың жұмыс кестесі қаңтардың екінші жартысында жарияланады.
Мұнда тегін негізде білім беру және мәдени іс-шаралар өткізіледі, жастар білікті психологиялық және заң көмегін, жұмысқа орналасуға, қаржы мәселесі бойынша кеңес ала алады.
«Алматы – жастар қаласы. Бізде 14 пен 35 жас аралығындағы 680 мыңнан астам жас бар. Бірақ бас қосып ой бөлісетін, қиын кезде көмек көрсететін орталық қалада болған емес. Қазір біз бұл мәселені тиімді шешіп жатырмыз. Жыл соңына дейін базалық инфрақұрылым құруға тырысамыз», - деді Ерболат Досаев жастармен кездесу барысында.
Алматы әкімі коммуналдық орталықтардың резиденттерін жұмысқа орналастыру және жұмыс берушілермен одан әрі серіктестік үдерісін бақылау маңызды екенін атады.
«Бізге сіздерден кері байланыс қажет: барлық білім беру курсы мен біліктілікті арттыру курсы, жастар бағдарламасын қазіргі заманға бейімдеу керек десеңіз, қайта қарастыруға дайынбыз. Мемлекет басшысы өз сұхбатында айтқандай, жастарға ерекше көңіл бөледі. Алдағы 2-3 онжылдық жастардың қолында», - деді Ерболат Досаев.
Егер қазір Алматының әр ауданында 1 комьюнити орталық ашылса, онда жыл ішінде олардың саны екі есеге артады. 2025 жылға қарай мегаполисте осындай 16 алаң жұмыс істейді. Жастар жаңа мамандықтар мен қажетті дағдыларды үйге жақын маңдағы комьюнити орталықтан үйрене алады.
«4 курстың соңында аспаз болып жұмыс істедім, университеттен кейін не істеу керектігін білмедім. Сосын «Jasalmaty.kz» платформасында маркетинг курсын тауып, оқудан кейін сол компанияға жұмысқа орналастым. Енді өз орнымды тапқандаймын. Оқу үдерісі өте ұнады, App Store-да порталдың мобильді қосымшасы бар екені ыңғайлы», - деді комьюнити орталыққа келуші Ержан Тәңірбергенов.
Тұрғылықты жерін ескеріп сабаққа қатысу мүмкіндігі тыңдаушыларды көбірек қамтуға мүмкіндік береді. «Жұмыссыздар коммуналдық орталықтан мемлекеттік бағдарламалар бойынша кеңес ала алады, сонымен қатар, жұмысқа орналасу мен оқуға қатысты нәрселерді біле алады. Ол үшін «Jasalmaty.kz» порталына тіркеліп, «JobFair365» жұмысқа орналастыру платформасында түйіндеме жазу керек. Бұл ретте, көздеген бос жұмыс орны бойынша қажетті дағдысы болмаса, жастар «SkillBridge» платформасында өзекті мамандықтар бойынша қысқа мерзімді оқытудан өте алады, - деді Алматы қаласы жастар саясаты басқармасының басшысы Қайыржан Меңдіғалиев.
Комьюнити орталықтарының резиденттері үшін барлық қызмет тегін. Бұған қоса, көлікке, қоғамдық тамақтануға, спорттық және мәдени инфрақұрылымды пайдалануға, оқыту мен шеберлік дәрістеріне жеңілдіктер беретін кешенді дисконттық карталар іске қосылған.