Алматы жолдарында бірінші жартыжылдықта мыңға жуық мас жүргізуші ұсталды.
Бұл мәліметтерді жергілікті полиция қызметі бірінші жартыжылдықты қорытындылай келе беріп отыр, деп хабарлайды Almaty-akshamy.kz Polisia.kz-ке сілтеме жасап.
«Жыл басынан бері 470 501 ЖҚЕ бұзу дерегі анықталды. Көлікті мас күйінде басқарған 988 жүргізуші ұсталды. Сот шешімімен 1 549 жүргізуші көлік құралын басқару құқығынан айырылды. 972 көлік жүргізушісі әкімшілік қамауға алынды. Рөлдегі мас жүргізуші – қылмыскер. Бұл аксиома, өкінішке орай, көп жағдайда адам өлімімен және көптеген отбасылардың қайғысымен байланысты. Еске сала кетейін, көлікті мас күйінде басқарғаны үшін заң бойынша жаза күшейтілген. Бірінші рет көлік құралын басқару құқығынан айыру мерзімі – 7 жыл. Сонымен қатар, 30 тәулікке дейін әкімшілік қамауға алу қарастырылған», – деді Алматы қалалық полиция департаменті бастығының орынбасары Нұрлан Алмасбеков.
Сондай-ақ, ЖПҚ алты айда шаһар жолдарында 1473 жол-көлік оқиғасы тіркеліп, соның салдарынан 1806 адам зардап шеккенін, тағы 42 адам қайтыс болғанын хабарлады.