Ерболат Досаев «Алматы - біздің ортақ үйіміз» науқанының «Жарқын күз» күзгі циклін жариялады
Алматы тұрғыны іргелес аумақты ірі көлемді қоқыспен бітеп тастаған кәсіпкерлерге шағымданды
Алматы әкімі Ерболат Досаевтың Түрксіб ауданының тұрғындарымен кездесуі барысында қала тұрғыны іргелес аумақты ірі көлемді қоқыспен бітеп жатқан кәсіпкерлерге шағымданды.
Түрксіб ауданының әкімі Бақытжан Ақжаров нысандарды паспорттау бойынша жұмыстар жүргізіліп жатқанын хабарлады.
Естеріңізге сала кетейік, Алматыда «Таза Қазақстан» бағдарламасы және абаттандырудың жаңа ережелері аясында қалалық нысандарды паспорттау басталды.
Бұл шара қала тұрғындары мен қонақтары үшін жайлы, қауіпсіз және экологиялық таза орта құру стратегиясының бөлігі болып табылады. Паспорттаудың негізгі міндеті-кәсіпкерлер үшін іргелес аумақтарды абаттандыру үшін жауапкершілік шекараларын анықтау.
Алматының коммуналдық инфрақұрылымды дамыту басқармасының деректері бойынша қалада барлығы 5 590 кәсіпкерлік нысан паспорттауға жатады. Қазіргі уақытта мыңдаған кәсіпкерлер паспорттарға қол қойды. Барлық паспорттау жұмыстары келесі жылдың сәуір айында аяқталады.
«Барлық кәсіпкерлер оларға тікелей іргелес учаскелер үшін жауапты болады. Қоқысты, әсіресе ірі габаритті қоқысты шығару бойынша экология бөлімімен қоқыс шығаратын компаниялармен шарт жасасу және контейнерлік алаңдарды жүктемей қоқысты уақтылы шығаруды қамтамасыз ету үшін жұмыс істейміз», - деді аудан әкімі.
Қала басшысы бүгін, 18 қазанда Алматыда «Таза Қазақстан» жалпы республикалық бағдарламасы және «Алматы – біздің ортақ үйіміз» қалалық науқаны аясында қала тұрғындары арасында экологиялық мәдениетті арттыруға бағытталған «Жарқын күз» науқаны басталғанын еске салды. Алдағы күндері қаланы күзгі-қысқы кезеңге дайындауға ерекше назар аударылатын болады.
Ерболат Досаев аудан әкіміне осы науқан аясында аумақты жиналған қоқыстардан тазартуды тапсырды.
«Бұдан әрі, қараша айында біз компаниялардың өздері жұмыс істейтін учаскелері үшін жауап беруіне, келісімшарттар жасасуына және қоқыс шығаруына ықпал ететін боламыз», - деді Алматы әкімі.
Алматыда 18-24 қазан аралығында қала көшелерінде, аулаларда, қоғамдық кеңістіктерде және жол инфрақұрылымы бойында ағаштарды санитарлық кесу, құлаған жапырақтар мен қоқыстарды жинау бойынша ауқымды жұмыстар жоспарланған.