Алматыда жаңа мамандықтар мен құзыреттерді техникалық және кәсіптік білім беру жүйесіне енгізу мәселесі қаралған форсайт-сессия өтті. Іс-шараға «Атамекен» ҰКП, «Мамандығым – Болашағым» жобалық офисі, салалық қауымдастықтар, ҮЕҰ, сондай-ақ колледж басшылары мен оқытушылар қатысты.
Жиында креативті индустриялар, ақпарат және байланыс, сервис пен қонақүй бизнесі, құрылыс пен урбанистика, көлік пен логистика және білім беру сынды алты негізгі салаға назар аударылды.
Алматы Құрылыс және менеджмент колледжі директорының орынбасары Жұхаргүл Аблизованың айтуынша, құрылыс саласы қарқынды өзгерістерге ұшырап отыр.
– Жаңа мамандықтар атласына осы бағыт бойынша 11 позиция енгізілді. Олардың қатарында сити-менеджер, 3D-ғимараттар жобалаушысы, өндірісті роботтандыру маманы бар. Бұл еңбек нарығының нақты сұранысына сай келеді, – дейді Жұхаргүл Аблизова.
Қонақүй және туризм индустриясы колледжі кәсіби оқыту жөніндегі директорының орынбасары Лилия Рахимгереева да өз саласындағы өзгерістерді атап өтті:
– Қонақүй индустриясында көптеген дәстүрлі мамандықтар жойылып, жаңа бағыттар пайда болуда. Экология, автоматтандыру, цифрлық қызметтер – басты трендтер. Тек біздің сала бойынша атласқа 21 мамандық енгізілді. Биыл алғаш рет «дестинацияны басқару» атты жаңа мамандық ашылып, ішкі туризмді дамытуға бағытталды, – деді ол.
Алматы қаласы Білім басқармасына қарасты Ғылыми-әдістемелік орталықтың техникалық және кәсіптік білім беру бөлімінің басшысы Гүлнар Сүлейменова қорытындысында Жаңа буынның еңбек нарығына дайын болуына колледждер мен жұмыс берушілердің бірлескен еңбегі қажет екенін баса белгілеп өтті. Ол форумда 114 перспективалы мамандығы зерделеніп, соның ішінде 69 позицияны енгізу жоспарланғанына тоқталды:
– Бұлар 4 мамандық, 29 құзырет, 26 модуль және 11 оқу нәтижесі. Бұл қатарда виртуалды саяхат дизайнері, құрылыс саласындағы роботтандыру мамандары бар. Жаңа буынның еңбек нарығына дайын болуына колледждер мен жұмыс берушілердің бірлескен еңбегі қажет, – деді ол.
Форсайт-сессия қорытындысында білім беру бағдарламалары мен стандарттарын жаңғырту жалғасатыны белгілі болды. Мақсат – Алматыдағы білім беру жүйесін цифрлық экономиканың талаптарына бейімдеп, жұмыс берушілердің сұранысына сай кадрлар даярлау.