Алматыда жаңа жыл түні қалалық қызмет күшейтілген режимде жұмыс істеп жатыр
Жаңа жыл қарсаңында және мереке күндері Алматы қаласының қалалық қызметі күшейтілген жұмыс режиміне көшті. Тұрғындардың көбі бұл күндерді жақындарымен бірге өткізгенімен, мыңдаған маман қаланың қауіпсіз, таза әрі жылы болуын қамтамасыз ету үшін тәулік бойы қызмет атқарып жатыр.
Қоғамдық тәртіпті сақтау және адамдар көп жиналатын орындарда жедел әрекет ету мақсатында патрульдеу күшейтілді. Құқық бұзушылықтардың алдын алуға, сондай-ақ, балалар мен кәмелетке толмағандардың қауіпсіздігіне ерекше назар аударылып отыр. Сонымен қатар, жедел әрекет ету қызметтері, медицина бригадалары, коммуналдық және апаттық қызметтер тәулік бойы үздіксіз жұмыс істеуде.
Жаңа жылды жұмыс орнында қарсы алып, мереке күндері еңбек етіп жүрген барша маманға алғыс білдіреміз. Қашықта болса да, жақындарыңыздың ең жылы лебізі жаныңыздан табылсын. Жаңа жыл құтты болсын!