Алматыда музыка, заманауи өнер, театр және белсенді демалысты тоғыстыратын ауқымды қысқы қалалық фестиваль – «Панфиловтағы Жаңа жыл» басталды.
Жоба мегаполистің басты жаңа жылдық алаңдарының біріне айналып, 21 желтоқсаннан бастап Панфилов көшесінде өтіп жатыр. Фестивальдің ашылуы жас әрі талантты диджейлерді қолдауға арналады.
21-30 желтоқсан аралығында мұнда DJ-марафон өтеді: іріктеуден өткен 15 қатысушы күн сайын сағат 17:00-ден 22:00-ге дейін әрқайсысы екі сағаттық сеттерін ұсынады. Байқау қалалық музыканың жаңа толқыны өкілдерін біріктіріп, үздік қатысушылар фестиваль серіктестерінен сыйлықтар мен жүлделер алады. Музыкалық бағдарлама Панфилов көшесін ашық аспан астындағы жанды сахнаға айналдырады.
Музыкамен қатар фестивальдің көркемдік бағыты да дамымақ. 16 желтоқсанда «Эко-шырша Алматы» байқауының open-call кезеңі аяқталған болатын. Байқауға мектеп оқушылары, тәуелсіз суретшілер, дизайнерлер мен шығармашылық ұжымдардан 30-дан астам өтінім түсті. Іріктеу нәтижесінде финалға өткен 15 қатысушының жұмыстары фестиваль аясында жүзеге асырылып, көпшілікке ұсынылады. Әр финалистке қайта өңделген және екінші реттік материалдардан арт-шырша жасау үшін 100 мың теңге көлемінде грант бөлінген.
Байқау қорытындысы мен жеңімпаздар негізгі мереке күндері жарияланып, үздік авторлар ақшалай сыйлыққа ие болады. Фестивальдің ең маңызды кезеңі 27-28 желтоқсанда өтеді. Бұл күндері Панфилов көшесінде үш метрлік марионеткалар, актерлер және жарық эффектілері қатысатын иммерсивті театрландырылған қойылым көрсетіледі.
Шоу Алматыға арнайы жазылған жаңа қалалық ертегіге негізделіп, көрермендерге кейіпкерлермен тікелей қарым-қатынас орнатуға мүмкіндік береді. Қойылым балаларға да, ересектерге де арналған және жаңа жылдық бағдарламаның ең әсерлі оқиғаларының бірі болмақ. Сондай-ақ осы күндері фестиваль аумағында қалалық snow-park ашылып, көрсетілімдік сырғанаулар мен жарыстар ұйымдастырылады. Сонымен қатар жас музыканттар байқауы өтіп, жаңа есімдер мен қалалық қауымдастықтарды қолдау жалғасады.
Ұйымдастырушылардың айтуынша, «Панфиловтағы Жаңа жыл» – бұл көшені мерекелік безендіру ғана емес, мәдениет, экология, музыка және жанды қарым-қатынасты біріктіретін заманауи қалалық дәстүр қалыптастыруға бағытталған жоба. Фестиваль Алматы тұрғындары мен қонақтары үшін Жаңа жыл қарсаңында жарыққа, қозғалысқа және жаңа қалалық көңіл күйге толы ашық кеңістікке айналмақ.