Алматыда тұрғындар мен қала қонақтарының қатынау мүмкіндігін арттыру мақсатында биыл 27 қарашадан бастап «Спорт сарайы – Медеу спорт кешені» бағыты бойынша жаңа, тұрақты №21 автобус маршруты іске қосылады, - деп хабарлайды Aqshamnews.kz.
Бағыттың жалпы ұзындығы 33,6 км. Бұл туралы Жол қозғалысы және жолаушылар көлігін ұйымдастыру басқармасының өкілдері хабарлады.
Бағытқа «Алматыэлектротранс» ЖШС қызмет көрсетеді. Күн сайын 15 автобус жолаушылар тасымалдауға шығады, қозғалыс аралығы - 8 минут. Пайдаланылатын көлік құрамы – үлкен сыйымдылықтағы автобустар: 28 отыратын және 85 түрегеп тұратын орын, бұл танымал туристік әрі спорттық бағытта жолаушылар тасымалдауға мүмкіндік береді.
Автобустар бейнебақылау жүйесімен, салқындатқышпен және мобильді құрылғыларды қуаттауға арналған USB-ұяшықтармен жабдықталған. Жүргізуші кабинасына заманауи электронды жүйе орнатылған, оның ішінде жүргізушінің шаршауын және әрекеттерін бақылайтын DMS жүйесі бар.
Салонда аялдамаларды автоматты түрде жариялау жүйесі жұмыс істейді. Автоматтандырылған хабарлау жүйесін қолдану жолаушылардың жайлылығын арттырып, ерекше қажеттілігі бар адамдар үшін қолжетімділікті жақсартады және қажетті аялдамадан өтіп кету жағдайын азайту арқылы қауіпсіздікті күшейтеді.
