Әділет министрлігінің Алматы қаласы бойынша департаменті 2024 жылдың 28 тамызында «HUGO BOSS» тауар белгісін заңсыз пайдаланған контрафактілік өнімдерді анықтады, деп хабарлайды aqshamnews.kz
«HUGO BOSS AG» компаниясының өкілінің шағымы негізінде Алматы қаласының көтерме сауда базарларының бірінде ерлер киімін көтерме сатумен айналысатын жеке кәсіпкерге жоспардан тыс тексеру жүргізілді. Тексеру барысында «HUGO BOSS» тауар белгісін заңсыз пайдалану фактісі анықталды.
Үйлестірілген іс-қимылдар нәтижесінде 1,5 миллион теңгеден астам сомаға 1 600 бірлік жалған тауар тәркіленді. Кәсіпкер бұл жалған тауарларды Қазақстанның барлық өңірлеріне сатқан. Сонымен қатар, тауардың сатып алу құны нақты сомадан 300%-ға асып кеткені анықталды.
Қазіргі уақытта кәсіпкер ҚР ӘҚБтК-нің 158-бабы бойынша әкімшілік жауапкершілікке тартылуда. Осы баптың санкциясы тауарларды тәркілей отырып, 80 айлық есептік көрсеткішке дейін айыппұл салуды көздейді.
Әділет органдары зияткерлік меншік саласындағы жұмысын жалғастыруда.