Алматы қаласының Әуезов ауданында шаруашылық нысанынан басталған өрт үш қабатты ғимараттың шатырын шарпыды. Қазіргі сәтте өрт толық сөндірілді, деп хабарлайды Aqshamnews.kz ҚР ТЖМ баспасөз қызметіне сілтеме жасап.
«Әуезов ауданында шаруашылық құрылыстан шыққан өрт үш қабатты ғимараттың шатырына тараған. Қала құтқарушылары тілсіз жауды дер кезінде ауыздықтады», – делінген хабарламада.
Министрлік мәліметінше, өртті сөндіруге 32 қызметкер және Алматы ТЖД-ның 9 арнайы техникасы жұмылдырылды. Су үздіксіз беріліп отырған. Оқиға кезінде шатырдың бір бөлігі опырылып түскен.
Қуанышқа орай, зардап шеккендер жоқ. Сағат 11:22-де өрт 200 шаршы метр аумақта толықтай сөндірілгені хабарланды.