Марафонның басталуы Халықаралық еріктілер күніне орайластырылған.
4-8 желтоқсан аралығында қалада 10 мыңнан астам тұрғынды қамтитын 20 іс-шара өткізіледі, деп хабарлайды aqshamnews.kz.
Бұл туралы Өңірлік коммуникациялар қызметінің алаңында Алматы қаласы еріктілер фронт-кеңсесінің басшысы Бағдат Анарбаева хабарлады.
Ұйымдастырушылардың айтуынша, марафонның басты мақсаты - еріктілікті насихаттау, белсенділерді қолдау және қала тұрғындары арасында әлеуметтік жауапкершілікті дамыту.
Сонымен қатар, Бағдат Анарбаева 1985 жылы БҰҰ Бас Ассамблеясы 5 желтоқсанды Халықаралық еріктілер күні деп жариялағанын еске салды, содан бері оны бүкіл әлем бойынша еріктілер атап өтеді.
«Алматы қаласы, Қазақстанның ең ірі мегаполисі, елдің экономикалық және мәдени өмірінің жүрегі ғана емес, сонымен қатар қуатты еріктілер қозғалысының орталығы. Мұнда әлемді жақсы жаққа өзгертуге ұмтылған мыңдаған адамдардың күш-жігері біріктірілген. Мегаполистің бай және серпінді еріктілер қауымдастығы аз қамтылған отбасыларға көмектесуден бастап қоршаған ортаны қорғауға дейінгі түрлі салаларды қамтиды», - деп атап өтті ол.
ӨКҚ спикері Алматының волонтерлері жыл сайын қолдауға мұқтаж жандарға көмектесуге ниет білдіретінін атап өтті. Бүгінгі таңда Алматыда жалпы еріктілер саны 50 000-нан асатын 30-дан астам ірі волонтерлік ұйымдар бар.
«Марафонның әрбір жобасы — игі іс жасауда бастары біріккен жандардың біздің қоғамымыздың дамуына қосқан үлесі және үлгісі», — деп атап өтті спикер.
Марафонның негізгі іс-шараларының қатарында: балалар үйінің тәрбиеленушілерін қолдау бойынша акциялар, экологиялық шеберлік сыныптарын өткізу, жануарларға арналған баспаналарға көмек көрсету және жалғызбасты зейнеткерлерге арналған шығармашылық кештер ұйымдастыру бар. Сондай-ақ, қаланы абаттандыру челлендждері мен еріктілер арасында донорлық акция жоспарланған.
Марафон ең белсенді қатысушылар мен еріктілер ұйымдарын марапаттау рәсімімен аяқталады.