Алматы ҚР ЕХӘҚМ Халықты әлеуметтік қорғау саласындағы реттеу және бақылау комитеті департаментінің биылғы бірінші тоқсандағы жұмысын қорытындылады, – деп хабарлайды aqshamnews.kz тілшісі.
Бұл туралы Өңірлік коммуникациялар қызметінде өткен брифингте департамент басшысы Мұрат Мұратбеков мәлімдеді.
Спикердің айтуынша, қаңтар–наурыз айында қалада 29 128 мемлекеттік қызмет көрсетіліп, олардың барлығын заңды бұзбай, белгіленген мерзімде орындап шыққан. Соның ішінде 23 628 қызмет зейнетақы мен әлеуметтік қамтамасыз ету саласына тиесілі болса, тағы 5 500 қызмет мүгедектікті белгілеу мен әлеуметтік қорғау шараларын әзірлеуге қатысты болыпты.
«Қызметтің басым бөлігін электрондық үкімет порталы мен «Азаматтарға арналған үкімет» мемлекеттік корпорациясы арқылы көрсетті. Бұл халыққа барынша ашық әрі қолжетімді болуды қамтамасыз етеді», - дейді спикер.
Ең көп сұранысқа ие қызметтер:
- бала туу мен күтіміне байланысты жәрдемақы — 6 887 қызмет (23,6%);
- мүгедектікті белгілеу — 5 500 (19%);
- базалық зейнетақы төлемі — 4 353 (15%);
- жасына байланысты зейнетақы төлемі — 3 956 (13,6%).
Медициналық-әлеуметтік сараптама саласында да ілгерілеу бар. Алғашқы мүгедектік бойынша қарқын көрсеткіші 4,6%-ды құрап, былтырғымен салыстырғанда төмен, республикалық орташа деңгейден (6,7%) айтарлықтай аз болды. Азаматтардың 97,3%-ына мүгедектік тағайындалған.
Ересектер арасындағы алғашқы мүгедектік себептері:
• қатерлі ісіктер — 49,9%;
• қан айналымы жүйесінің ауруы — 18,7%;
• психикалық ауру — 6,4%.
Қызмет көрсетудің проактивті форматына ерекше назар аударылып отыр. Спикердің айтуынша, мүгедектікке қатысты шешімнің шамамен 48%-ын азаматтарды араластырмай-ақ, қашықтан қабылдайды екен.
Бақылау мен мониторинг бағытында:
• оңалту құралына берілген 31 мың өтініштің 47,7%-ы орындалған;
• тізімнен 76 сенімсіз жеткізуші шығарылған;
• нысандардың қолжетімділігі бойынша 8 жоспардан тыс тексеру жүргізіліп, 39 заңбұзушылық анықталып, 1,8 млн теңге көлемінде айыппұл салынған.
Сонымен қатар бірінші тоқсанда департаментке азаматтардан 1 562 өтініш келіп түскен. Олардың басым бөлігі медициналық-әлеуметтік сараптама, зейнетақымен қамтамасыз ету мен мүгедектігі бар адамдарды әлеуметтік қорғау мәселесіне қатысты болып шықты.