Алматы әкімі Дархан Сатыбалдының төрағалығымен «Халық қатысатын бюджет» жобасының іске асырылу барысына арналған кеңес өтті, – деп хабарлайды aqshamnews.kz тілшісі.
Жиында тұрғындардың дауыс беруі арқылы қолдау тапқан бастамалардың орындалу барысы қаралды. Биыл жоба аясында 219 бастама жүзеге асырылып жатыр. Оның 29-ы аяқталған, 188 жоба іске асырылу кезеңінде, ал екі жоба бойынша конкурстық рәсімдер жүргізіліп жатыр.
«Халық қатысатын бюджет» аясында қаланың әр ауданында қоғамдық кеңістіктер, скверлер, саябақтар, жүргіншілер аймақтары, аула аумақтары мен жағалаулар көркейтіліп жатыр. Барлық нысандағы құрылыс-монтаж жұмыстарын биылғы тамыз айының соңына дейін аяқтау көзделген.
Дархан Сатыбалды аудан әкімдеріне әрбір нысанды ерекше бақылауға алып, орындалып жатқан жұмыстардың жоғары сапасын қамтамасыз етуді және белгіленген мерзімнің сақталуын тапсырды.
Қала әкімі «Халық қатысатын бюджет» тұрғындармен тиімді өзара байланыс орнатудың маңызды тетіктерінің бірі екенін атап өтті. Бұл жоба алматылықтарға қалалық ортаны дамытуға тікелей атсалысып, көріктендірудің басым бағыттарын айқындауға мүмкіндік береді.
Кеңес қорытындысы бойынша аудан әкімдіктеріне барлық жобаны уақытылы аяқтау, жұмыстардың сапасына бақылауды күшейту және бастамалардың іске асырылу барысы туралы тұрғындарды budget.open-almaty.kz порталы арқылы тұрақты түрде хабардар етіп отыру тапсырылды.