Бұл туралы Алматы әкімі Ерболат Досаев Орталық коммуникациялар қызметінде өткен брифингте, қалада жүргізіліп жатқан сейсмоаудиттің нәтижелері туралы сұраққа жауап бере отырып мәлімдеді, деп хабарлайды aqshamnews.kz
«Халықаралық стандарттарға сай ғимараттар мен құрылыстардың нақты сейсмикалық тұрақтылығын анықтау мақсатында қалада 21 441 нысанды қамтыған сейсмоаудит, яғни нысандарды паспортизациялау жүргізілді», – деп атап өтті мегаполис басшысы.
Оның айтуынша, 2017-2018 жылдары жүргізілген сейсмоаудиттің нәтижесінде 10 525 нысан зерттелсе, 2023-2024 жылдары екінші кезең аясында 10 916 нысан тексерілген.
«Келесі жылдың басында «ҚазНИИСА» АҚ атқарылған жұмыстардың қорытындысы бойынша аналитикалық есеп ұсынады. Осыдан кейін тұрғын үй кешендері мен әлеуметтік нысандарды сейсмикалық күшейту бойынша алғашқы кезектегі шаралар жоспары қабылданады. Жалпы, нақты мәліметтерге сүйене отырып және АҚШ, Жапония, Израиль тәжірибесін ескере отырып, біз ғимараттарды сейсмикалық күшейту бойынша қалалық бағдарламаны әзірлейміз және іске қосамыз», – деп атап өтті Ерболат Досаев.
Сонымен қатар, қалада мемлекеттік әлеуметтік ғимараттарды сейсмикалық күшейту жұмыстары жыл сайын жүргізілуде. 2025 жылы Бостандық және Медеу аудандарындағы 3 мектептің сейсмикалық күшейту жұмыстары аяқталады, ал Түрксіб ауданындағы №50 мектеп-лицейдің сейсмикалық күшейту жұмыстары басталады. Сондай-ақ, Әуезов, Бостандық және Медеу аудандарындағы 7 балабақшада осындай жұмыстар жүргізіледі.