Алматы қаласының Қала құрылысын бақылау басқармасы Қарағайлы ықшамауданында орналасқан тұрғын үй кешенін бұзу туралы сот шешімі мен заңсыз «Француз үйі» атауын пайдалану мәселелері бойынша қосымша ақпарат берді, деп хабарлайды aqshamnews.kz
Жоспардан тыс тексеру барысында тұрғын үй кешенінің эскиздік жобаны бекітпей, сараптамасыз және тиісті құжаттамасыз салынғаны анықталған. Осыған байланысты тапсырыс берушіге әкімшілік шаралар қолданылып, Алматы қаласының мамандандырылған ауданаралық экономикалық сотына кешенді бұзу туралы талап арыз жолданған.
2023 жылдың 26 шілдесінде сот бұл талап арызды қанағаттандырды, ал 2023 жылдың 26 қазанында қалалық сот шешімді өзгеріссіз қалдырды. 2024 жылдың 30 қаңтарында атқару құжаты Әділет департаментіне тапсырылып, атқарушылық іс жүргізу басталды.
Құрылыс салушы компания «Француз үйі» атауын заңсыз пайдаланғаны үшін сот шешімімен жауапқа тартылды. 2024 жылдың 29 сәуірінде Алматы қаласының Мамандандырылған ауданаралық экономикалық соты «Французский Дом BSB» ЖШС-нің талап арызын қанағаттандырып, бұл атаумен жылжымайтын мүлік сатуға тыйым салды. Сонымен қатар, «Француз үйі» тауар белгісін тұрғын үй кешенінің барлық құжаттарынан, интернет-ресурстардан және жарнамалық материалдардан алып тастау міндеттелді.
Алматы қаласының Қала құрылысын бақылау басқармасы заң бұзушылықтарды болдырмау мақсатында бақылау шараларын күшейтуді жалғастыруда.