Алматы қаласында студенттер арасында «Қазақ күресі» бойынша турнир өтті.
Бұл шара Қазақстанның патриоты, желтоксан оқиғасына қатысушы Ербол Сыпатаевтың 60 жылдығына арналды. Спорттық шара «ЦСКА» спорт кешенінде ұйымдастырылып, оған қаладағы 20-дан астам оқу орнының студенттері қатысты, деп хабарлайды aqshamnews.kz
Турнирдің ұйымдастырушыларының айтуынша, бұл іс-шара Қазақстанның ұлттық дәстүрлерін сақтап, мәдени мұрасын дәріптеуге үлкен ықпал етпек.
«Қазақ күресі» турнирі тек спорттық жарыс қана емес, ол Ербол Сыпатаев сынды ұлт мақтанышы болған тұлғаның ерлігі мен патриотизмін жастарға үлгі ету мақсатын да көздейді. Мұндай іс-шаралар жастардың бойында ұлттық рухты қалыптастырып, олардың бойында патриоттық сезімді нығайтуға зор ықпал етеді, — деді халықаралық қоғамдық «Жанашыр» қорының басшысы Жаныл Апетова.
Турнир барысында қатысушылар күш сынасып, өз шеберліктерін көрсетіп, қазақ күресінің дәстүрін сақтауға және оны дамытуға үлкен үлес қосты. Барлығы 200-ден астам студент жарысқа қатысып, 3 салмақ дәрежесінде үздіктер анықталды. Әрбір жекпе-жек өте тартысты өтті, ал көрермендер қызығушылықпен әртүрлі шайқастарды тамашалады. Жарысқа қатысушылар өздерінің физикалық мүмкіндіктері мен күш-жігерін сынап, жеңіске деген ұмтылыстарын көрсетті.
Жарыс нәтижесінде жеңімпаздар арнайы медальдармен және естелік сыйлықтармен марапатталды. Ал, жүлдегерлер қатарына кірмеген, бірақ жарысқа белсене қатысқан барлық қатысушыларға алғыс хаттар мен кішкентай сыйлықтар табыс етілді.
Турнирдің құрметті қонақтары ретінде Ербол Сыпатаевтың сыныптастары, ауылдастары, жақындары мен соңғы уақыттарында бірге болған достары қатысты. Сондай-ақ, желтоқсаншылар ұйымының жетекшілері де шараға қатысып, Ербол Сыпатаевтың есімін мәңгілікке ұлықтау мақсатында сөз сөйледі.
Бұл маңызды шараны ұйымдастырушы — халықаралық қоғамдық «Жанашыр» қоры Алматы қаласының Қоғамдық даму басқармасының қолдауымен өткізді.