Алматы қаласында эпидемиологиялық жағдай тұрақты. Өңірлік коммуникациялар қызметінде өткен брифингте Алматы қаласы Санитарлық-эпидемиологиялық бақылау департаменті басшысының орынбасары Асел Калыкова 2025 жылдың төртінші аптасында қалада ЖРВИ-дің 17 578 жағдайы тіркелгенін хабарлады. Бұл көрсеткіш өткен жылдың осы кезеңімен салыстырғанда 1,7 есеге төмен, алайда алдыңғы аптамен салыстырғанда 2,7%-ға жоғары.
Мамандардың айтуынша, инфекциялардың өршуі негізінен балалар арасында байқалады, бірақ ауру деңгейі бақылаудың шегінен аспайды.
Эпидемиологиялық маусым басталғалы (2024 жылдың 1 қазанынан бастап) 297 756 ЖРВИ жағдайы тіркелді, олардың 62,7%-ын балалар құрайды. Зертханалық зерттеулердің нәтижесінде қалада тұмау вирустарымен қатар, риновирус, бокавирус, аденовирус және басқа да ЖРВИ қоздырғыштары жүріп жатқаны анықталды.
Қала аумағында сегіз қадағалау орталығы жұмыс істейді, оның төртеуі емханаларда, қалған төртеуі стационарларда орналасқан. Бұл орталықтарда жедел респираторлық инфекцияларға тұрақты бақылау жүргізілуде.
Санитарлық-эпидемиологиялық қызмет мамандары сырқаттанушылықтың өсу кезеңінде алдын алу шараларын сақтау қажеттігін еске салады: адам көп жиналатын орындардан аулақ болу, маска тағу, иммунитетті нығайту және ауру белгілері пайда болған жағдайда уақытылы дәрігерге қаралу.