Орта есеппен 300 теңгеге артады
Алматыда электр қуатының тарифы көтеріледі. Бұл Қазақстанда электр энергиясына тарифтерді саралауды жою бойынша өткен дөңгелек үстел барысында белгілі болды, деп хабарлайды Almaty-akshamy.kz ҚазАқпаратқа сілтеме жасап.
Бәсекелестікті қорғау және дамыту агенттігінің Отын-энергетика өнеркәсібі департаменті директорының міндетін атқарушы Қуат Асамбековтың сөзінше, пилоттық жоба аясында Алматы тұрғындарына электр энергиясы үшін түбіртектердегі ай сайынғы төлем құны тұтынылатын энергия көлеміне байланысты орта есеппен 300 теңгеге артады.
«Халықтың әлеуметтік мұқтаж топтары үшін тариф өзгермейді, айырманы оларға атаулы тұрғын үй көмегі есебінен мемлекет субсидиялайтын болады. Қазақстанның қалған өңірлерінде электр энергиясына тарифтерді саралауды жою 2023 жылдан басталады»,- деді ол.
Спикер тұрмыстық тұтынушылар үшін тарифтер заңды және бюджеттік тұтынушылар үшін жасанды өсімге байланысты төмендеу бағытында сараланғанын түсіндірді.
«Тұтынушылар арасындағы тарифтердің саралануын төмендету шамамен 10%-ды құрайды. Яғни, тұрмыстық тұтынушылар санатына 10 пайызға өсім болады. Бірақ бұл жерде мәселе қымбаттатуда емес. Орташа тариф мөлшерлемесі өспейді. Мұнда мәселе айырмашылықты азайту туралы болып отыр. Сайып келгенде, барлығы бірдей тариф төлеуі керек», - деді Қуат Асамбеков.
Ол жобаның бірінші кезең аясында жеке және заңды тұлғалардың тарифтері арасындағы айырмашылық шамамен 30 пайызға төмендейтінін атап өтті.
Бұған дейін Бәсекелестікті қорғау және дамыту агенттігі төрағасының бірінші орынбасары Рустам Ахметов Қазақстанда электр энергиясы тарифтерін саралауды жою бойынша әзірленген пилоттық жобаның артықшылығы туралы айтқан болатын.