Алматы қаласы мен Жетісу облысына қарасты Қылмыстық-атқару жүйесі департаментінің №12 мекемесіне экстремизм мен терроризм үшін сотталғандармен жұмыс істеуге арналған заманауи техникалық жабдықтар табысталды, деп хабарлайды Aqshamnews.kz.
Жабдықтар БҰҰ-ның Есірткі және қылмыс жөніндегі басқармасы (УНП ООН) мен АҚШ елшілігінің өкілдері қатысқан сапар аясында берілді. Делегация құрамында АҚШ үкіметінің терроризмге қарсы күрес жөніндегі бюросының аймақтық кеңесшісі Теодор Крейг, АҚШ елшілігінің өкілдері Джереми Андерсон мен Сесилия Чо, сондай-ақ БҰҰ-ның Қазақстандағы бағдарламалық кеңсесінің басшысы Мадина Сариева болды.
Қазақстан тарапынан ҚАЖК төрағасының орынбасары Жанибек Баймағанбетов, Оперативтік басқарма бастығының орынбасары Даулет Әбраев, Режим, қадағалау және күзет басқармасы бастығының орынбасары Ержан Жұмаділов, УВСПРСО-ның бас маман-психологы Людмила Игнатенко және ҚАЖ департаментінің бастығы Рысбек Тұрғымбаев қатысты.
ҚАЖ комитетінің мәліметінше, бұл шара қауіпсіздік деңгейін арттыруға, алдын алу жұмыстарының жаңа тәсілдерін енгізуге және экстремистік әрі террористік бағыттағы қылмыс жасағандармен жұмыс істейтін мамандарды қолдауға бағытталған.
– Халықаралық серіктестермен осындай ынтымақтастық қылмыстық-атқару жүйесінің әлеуетін арттырып, экстремизмнің алдын алуға септігін тигізеді, – деді ҚАЖ комитеті төрағасының орынбасары Ж. Баймағанбетов.
Бұл жабдықтардың табысталуы – Қазақстанның қауіпсіздік пен радикалданудың алдын алу саласындағы халықаралық ұйымдармен әріптестігінің дамуына жасалған тағы бір нақты қадам болды.