Жауапкершілікке тартылған азамат өзен арнасына лас су ағызған.
Алматы полицейлері экологияға зиян тигізген азаматы жауапқа тартты, деп хабарлайды Almaty-akshamy.kz.
Ішкі істер министрлігінің ресми сайтындағы мәлімет бойынша, полиция құқық бұзушыны «Казачка» өзеніне лас суларды заңсыз ағызғанын анықтау бойынша жергілікті іс-шара жүргізу кезінде анықтаған.
«Рейдтің негізгі мақсаты «Казачка» өзенінің ластану көздерін анықтау және бұзушылықтар анықталған кезде, оларды жою болып табылады. Ашық факт анықталды. Жергілікті тұрғын – А.есімді азамат көшедегі дәретханадан нәжісті осы өзенге ағызып келген. Ол бұл әрекеті үшін ҚР ӘҚбК-нің 505-бабы бойынша әкімшілік жауапкершілікке тартылды. Сонымен қатар, біз анықталған заң бұзушылықтарды дереу жоюды талап еттік», – деді Алматы қалалық ПД жергілікті полиция қызметі басқармасының бастығы Манап Саттаров.
Полицейлер бұл іс-шараның Алматы қаласы экология департаменті, Медеу аудандық ПБ ЖПҚБ экологиялық полициясы, Медеу ауданы әкімінің аппараты, «Қазгидромет» РМК, Алматы қаласы санитарлық-эпидемиологиялық бақылау департаменті, Балқаш-Алакөл бассейндік су қорын реттеу мен қорғау инспекциясы және Алматыдағы азаматтық қоғам өкілдерімен бірлесіп өткізілгенін түсіндірді.
