Алматы әкімдігі дизельді қоғамдық көлікті сатып алуға тыйым салды.
Алматыда экожүйені бақылау бекеттерінің саны 16-дан 40-қа дейін артты. Бұл туралы Экология министрі Серікқали Брекешев қала тұрғындарымен кездесуде айтты, деп хабарлайды Almaty-akshamy.kz ҚазАқпаратқа сілтеме жасап.
Халықпен кездесу барысында қаланың экологиялық жағдайы бойынша көптеген мәселе талқыланды.
Министр Алматы бірнеше жылдан бері ең ластанған қалалар тізіміне еніп келгенін айтты. Жыл сайын қала атмосферасына шамамен 138,7 мың тонна ластаушы заттар шығарылады. Ластану жылу көздерінің (ЖЭО-2 және ЖЭО-3), жеке тұрғын үйлердің және транспорттың шығарындыларымен байланысты. Бұдан бөлек, Алматы қаласының атмосфералық ауасының жай-күйіне Алматы облысының үш іргелес аудандарындағы газдандырылмаған өңірлердің шығарындылары теріс әсер етуде.
Биылғы 9 айда ел бойынша атмосфераға 900 мың тоннаға жуық ластаушы зат шықса, соның 31,9 мың тоннасы Алматы үлесінде. 2021 жылдың тиісті кезеңімен салыстырғанда ел бойынша шығарындылар 18% төмен (1,1 млн тонна), Алматыда - 28,4% төмен (44,6 мың тонна).
Сондай-ақ С.Брекешев қаланың экологиялық жағдайын жақсарту жөніндегі шаралар кешені алматылықтардың пікірлерін ескере отырып жасалғанын атап өтті. Осы орайда, қаладағы экожүйені бақылау бекеттерінің саны 16-дан 40-қа дейін артты. Барлық жаңа бекеттерді қоғамдық ұйымдардың күштері ұйымдастырып, Қазгидрометтің бірыңғай мониторинг желісіне біріктірілді (11 бекет – Эко сарапшы, 10 датчик – Павел Плотицын, 3 бекет – Скаймакс). Сондай-ақ Алматы қаласының әкімдігі Азия даму банкінің көмегімен Қазгидрометтің AirKZ мобильдік қосымшасымен интеграцияланған тағы 50 датчик орнатады.
Алматы әкімдігі дизельді қоғамдық көлікті сатып алуға тыйым салды. Қазірдің өзінде 827 электр және газ автобустары сатып алынды. Осы жылдың соңына дейін экологиялық таза қоғамдық көліктің жалпы саны 40% құрайтын болады. Ал бес жыл ішінде қалалық көлікті толығымен газ бен электр энергиясына ауыстыру жоспарлануда.