"Қазақстан" қонақ үйінің "Elegant Hall" конференц-залында діни экстремизм мен терроризмнің алдын алу бойынша ақпараттық-түсіндіру топтарының жылдық қорытындысына арналған дөңгелек үстел өтті. Іс-шараны Алматы қаласы Дін істері жөніндегі басқармасының "Дін мәселелерін зерттеу орталығы" ұйымдастырды.
Жиын барысында Алматы қаласы Дін істері жөніндегі басқармасының "Дін мәселелерін зерттеу орталығы" КММ басшысы Дулат Ибрагимов ағымдағы жылы қалада 655 түсіндіру іс-шарасы өткізіліп, 73 860 адам қамтылғанын атап өтті. Жалпы, ақпараттық жұмыстың басым бөлігі нақты мақсатты аудиторияларға бағытталған. Оның айтуынша, түсіндіру жұмыстары сотталғандар, діндар топтар, еңбек мигранттары, әлеуметтік әлсіз азаматтар, жұмыссыздар, спортшылар, мәдениет қызметкерлері, білім беру ұйымдары, мемлекеттік құрылымдар мен құқық қорғау органдары арасында жүргізілді. Жыл бойы орталықтың әлеуметтік желідегі арнайы парақшасына 500-ден астам ұсыныс пен пікір түскен. Алдағы жылы жұмысты жетілдіру және қамту аясын кеңейту жоспарланған.
Алматы қаласы Дін істері жөніндегі басқармасының басшысы Нұрлан Қиқымов ақпараттық-түсіндіру жұмысының тәсілдері туралы айта келе, бұл қызметтің бүкіл қала тұрғындарына бұқаралық түрде емес, дін идеологиясына қызығушылық танытқан немесе қауіп төндіруі мүмкін топтарға бағытталатынын жеткізді. Оның айтуынша, қала халқының өсімімен бірге діни мәселелер бойынша түсіндіру жұмысына деген қажеттілік те артып отыр.
Жиында ақпараттық-түсіндіру тобының мүшелері ұсыныстарын ортаға салып, жұмыс тиімділігін арттыру жолдарын талқылады. Қатысушылар брошюра дайындау, шетелдік сарапшыларды тарту және әлеуметтік парақшадағы белсенділікті күшейту қажеттігін атап өтті.
Дөңгелек үстел қорытындысында жыл бойы жоғары кәсібилік көрсеткен үздік
сарапшылар Алматы қаласы Дін істері жөніндегі басқармасының Алғыс хаттарымен және бағалы сыйлықтарымен марапатталды.
"Мемлекетіміздің дін саласындағы саясатын ілгерілетуге қосқан үлесі үшін, қоғамда діни экстремизм мен терроризмнің алдын алу және зайырлылық қағидаттарын насихаттау бағытындағы белсенді еңбектері үшін алғыс білдіреміз", – деді Нұрлан Қиқымов.
Айта кетейік, қаладағы ақпараттық-түсіндіру топтарында биыл 68 сарапшы еңбек етті. Оның 32-сі қазақ тілінде, 10-ы орыстілді, 26 маман екі тілде жұмыс жүргізген.