Алматыда азық-түлік инфрақұрылымын дамыту, отандық ауыл шаруашылығы тауарын өндірушілерді қолдау және халықты қолжетімді бағамен сапалы өніммен қамтамасыз ету жөніндегі шараларды іске асыру аясында өткізілетін демалыс күндері жәрмеңкелер желісін кеңейту бойынша жүйелі жұмыс жалғасып келеді.
Жәрмеңкелер Алматы қаласы әкімдігінің, Кәсіпкерлік және инвестициялар басқармасының қолдауымен өткізіледі. Оларды ұйымдастырушы – «Алматы» ӘКК» АҚ.
2025 жылы қаланың Алмалы, Әуезов, Бостандық, Жетісу және Медеу аудандарының аумағында демалыс күндері 430 жәрмеңке өткізілді. Биыл жәрмеңкелер санын 2,5 есеге ұлғайту көзделіп отыр. Осыған байланысты 2026 жылдың соңына дейін 1000-нан астам жәрмеңке өткізу жоспарланған.
Сонымен қатар, Түркістан, Жетісу, Алматы, Жамбыл, Қарағанды, Шығыс Қазақстан, Абай облыстарының, сондай-ақ Өзбекстан Республикасы мен Тәжікстан Республикасының фермерлері қатысатын кеңейтілген ауыл шаруашылығы жәрмеңкелерін ұйымдастыру қарастырылған. Бұл ретте, жаңа піскен көкөніс өнімдерін жеткізуге басымдық беріледі.
Аталған шаралар өңіраралық кооперацияны дамытуға, қаланың азық-түлік нарығын нығайтуға, отандық шаруалар үшін өнім өткізу арналарының аясын кеңейтуге, сондай-ақ Алматы тұрғындары үшін ауыл шаруашылығы өнімдерінің қолжетімділігін арттыруға, оның ішінде қалалық сауда желілерінің сөрелерінде көбірек ұсынылуына мүмкіндік береді.
Демалыс күнгі жәрмеңкелер өтетін мекенжайлар:
- Алмалы ауданы – Масанчи көшесі (Гоголь көшесі мен Әйтеке би көшесінің аралығы);
- Әуезов ауданы – Өтеген батыр көшесі (Абай даңғылынан төмен);
- Бостандық ауданы – «Қазақфильм» ш/а, Исиналиев көшесі;
- Жетісу ауданы – «Құлагер» ш/а, ХҚКО мен әкімдік ғимараты арасындағы автотұрақ;
- Медеу ауданы – Меңдіқұлов бульвары (Бектұров көшесінің қиылысы).