Алматыда дәрігерлер инсульт алған науқастардың өмірін сақтап, олардың қайтадан қалыпты өмірге оралуына көмектесіп келеді, – деп хабарлайды aqshamnews.kz тілшісі.
Тіпті жасы 95-ке келген науқастың да қайта аяққа тұруына мүмкіндік бар.
Күн сайын Алматы қалалық орталық клиникалық ауруханасының инсульт бөлімшесіне 4-5 пациент, ал жекелеген күндері — 10-12 адамға дейін түседі. Олардың арасында шұғыл көмекке мұқтаж қарт адамдар аз емес.
Соңғы науқастардың бірі 95 жастағы ер адам. Ол ауруханаға ауыр халде түскен, алайда ем қабылдап, оңалту шараларынан өткеннен кейін науқас қайтадан аяққа тұрған.
"Инсульт кезінде тез әрекет ету маңызды. Біздің міндетіміз — инсульт түрін мүмкіндігінше тезірек анықтау, қажетті емдеуді бастау және ауыр асқыну қаупін азайту. Жағдайды тұрақтандырғаннан кейін біз адамға жоғалған функцияларды қалпына келтіруге көмектесу үшін оңалтуға кірісеміз", — дейді врач-невролог, ОКҚБ инсульт бөлімінің меңгерушісі Азиз Исмаилов.
30 төсек-орынға арналған бөлімшеде науқастарға тәулік бойы мамандандырылған медициналық көмек көрсетіледі. Науқастың жағдайы мен медициналық көрсетілімдерге қарай дәрігерлер тромболитикалық терапияны және емдеудің басқа да әдістерін қолданады. Оңалту шаралары ерте кезеңде басталады: мамандар науқастардың қимыл-қозғалысын қалпына келтіруге, қайтадан жүруді үйренуіне және күнделікті өмірге оралуына көмектеседі.
Дәрігердің айтуынша, егде жас адамның сауығуына өздігінен кедергі келтірмейді. Дегенмен, ем нәтижесі инсульттің ауырлығына, ем-шараларының уақтылығына және науқастың жеке ерекшеліктеріне байланысты.
Инсультті қалай тануға болады?
Негізгі белгілер – беттің кенеттен қисаюы, қолдың немесе аяқтың әлсіздігі немесе жансыздануы, сөйлеудің бұзылуы. Осындай белгілер байқалған жағдайда дереу 103 немесе 112 нөмірі бойынша жедел жәрдем шақыру қажет. Симптомдар тез басылған жағдайда да, медициналық көмекке жүгіну қажет.
Инсульт кезінде әр минут маңызды. Науқас неғұрлым тезірек көмек алса, тиімді емдеу және қалпына келтіру мүмкіндіктері соғұрлым көп болады.