Алматылық полицейлер 17 жастағы бозбаланы тонаған тұрғынды ұстады.
Полиция қызметкерлері шабуыл жасаған азаматтың “ізін суытпай” ұстады.
«Қылмыс түнгі сағат 02:00 шамасында Алматының Әуезов ауданындағы ТҮ бірінің аумағында орын алды. 19 жастағы Г. есімді азамат өтіп бара жатқан жас жігітті байқап қалып, күш көрсетемін деп қорқытып, IPhone маркалы телефонын тартып алған. Сол арқылы жәбірленушіге 300 мың теңге көлемінде материалдық залал келтірген. Жас жігіт бейтаныс бозбаланың талабын орындағаннан кейін қылмыс туралы дереу полицияға хабарлаған. Осылайша, қарақшылық шабуылдың бетін ашып, күдіктіні ұстауға мүмкіндік туды», – дейді Алматы қалалық ПД криминалдық полиция басқармасының бастығы Қуатбек Науатов.
Спикердің айтуынша, ұсталған азаматтың басқа да осыған ұқсас заңсыз әрекеттерге қатысы бар-жоғы тексеріліп жатыр. ҚР Конституциясының 77-бабының 3-тармағының 1-тармақшасына және ҚР ҚПК-нің 19-бабының 1-бөлігіне сәйкес, соттың заңды күшіне енген үкімімен оның қылмыстық құқықбұзушылық жасаудағы кінәсі анықталғанға дейін әркім кінәсіз деп есептеледі.