37 жастағы ер адам оқиға орнында көз жұмды
Алматы полиция департаменті бүгін Абылай хан даңғылы мен Төле би даңғылының қиылысында болған ЖКО бойынша түсінік берді, деп хабарлайды Almaty-akshamy.kz.
Адам өліміне әкеп соқтырған жол-көлік оқиғасы дерегін тексеріп жатқан Алматы қалалық ПД анықтау Басқармасы мәліметінше, ЖКО сызбасына және бейнебақылау жүйелерінің талдауына сәйкес, бүгін 14 сағат 05 минутта жеке тасымалдаушылардың біріне тиесілі «МАЗ-203069» қоғамдық көлігінің жүргізушісі 1987 жылы туған А.есімді азамат, Абылай хан даңғылымен оңтүстік бағытта келе жатып, Төле би даңғылының қиылысында бағдаршамның тыйым салынған белгісіне өтіп кетіп, Төле би даңғылымен шығыс бағытта келе жатқан «GOLDEN DRAGON XML6125CN» маркалы қоғамдық көлікпен соқтығысқан.
Оны 1963 жылы туған А. есімді азамат басқарған. Соқтығысудан кейін 98-ші бағыттағы қоғамдық көліктің жүргізушісі қозғалысын жалғастырып, жаяу жүргіншілерді қағып кеткен. Оның нәтижесінде жаяу жүргіншілердің бірі - 37 жастағы ер адам оқиға орнында көз жұмды.
Аталған дерек ҚР ҚК-нің 345-бабы 3-бөлігіне сәйкес сотқа дейінгі тергеудің бірыңғай тізіліміне тіркелді. Тиісті сараптамалар тағайындалды.