Бүгін Өңірлік коммуникациялар қызметінің алаңында Алматы қаласы Коммуналдық инфрақұрылымды дамыту басқармасының басшысы Данияр Қырықбаев тұрғын үймен қамтамасыз ету бойынша атқарылған жұмыстар туралы есеп берді, деп хабарлайды Аlmaty-akshamy.kz Алматы қаласы Өңірлік коммуникациялар қызметіне сілтеме жасап.
Данияр Қырықбаев 2022 жылғы 14 шілдеде Алматы қаласының Тұрғын үй саясаты басқармасы Алматы қаласының Коммуналдық инфрақұрылымды дамыту басқармасы болып өзгертілгенін еске салды.
Данияр Қырықбаевтың хабарлауынша, бүгінде Алматы қаласында коммуналдық тұрғын үй қорынан тұрғын үйге мұқтаждар есебінде 37 236 азамат тұр, оның ішінде: көп балалылар – 4905; жетімдер – 2210; халықтың әлеуметтік осал топтары – 16 999; бюджет қызметкерлері – 13 122.
«7 айдың қорытындысы бойынша, 2623 азамат тұрғын үймен қамтамасыз етілді. Ағымдағы жылдың соңына дейін 5532 пәтер беру жоспарланып отыр, оның ішінде: 1451 – сатып алу құқығынсыз жалға берілетін тұрғын үй және 4081 – несиелік тұрғын үй. Атап өтсем, жыл басынан бері 325 тұрғын үй сертификаты берілді», - деді Д.Қырықбаев.
Тұрғын үй бөлу туралы айта келе, ӨКҚ спикері қаланы абаттандыру мәселесіне тоқталды. Айта кетерлігі, қаладағы қызмет көрсетілетін жолдардың жалпы ауданы 25 млн м²-ден асады. Алматының 2 318 көшесінде тазалық жұмыстары жүргізілуде. Қалада бұл жөндеу жұмыстарын 14 мердігер ұйым жүргізеді.
Күн сайын қала көшелерінен 1413 жол жұмысшысы мен 1087 бірлік арнайы техниканың күшімен 90 тоннадан астам қоқыс шығарылады.