Вакцинаны алдымен оқушылар, студенттер, жүкті және емізетін баласы бар аналар алады
Алматыда 12 қарашада COVID-19 вирусына қарсы Pfizer вакцинасын салу басталды. Қала бойынша 300-ден астам жасөспірім, жүкті әйелдер мен бала емізіп жүрген аналар Comirnaty Pfizer / BioNTech вакцинасын алды, деп хабарлайды Almaty-akshamy.kz.
Алматы қаласы Қоғамдық денсаулық сақтау басқармасының мәліметінше, ең алдымен мектеп оқушылары, колледж студенттері, жүкті және бала емізетін аналар екпе алған. Алматы қаласының тұрғыны Вероника Букша Алматыдағы №4 қалалық емханаға қаралған, осыдан 2 ай бұрын екінші сәбиін дүниеге әкелген. Вероника бүгін вакцинаны бірінші болып алды.
«Мен бала емізетін анамын, сондықтан баламды, өзімді, отбасымды мүмкіндігінше қорғағым келеді, емханадан медицина қызметкерлері шақырып, алғашқылардың бірі болып Pfizer вакцинациясын алдым, мен өте қуаныштымын. Себебі мен осы күнді күткен едім», - дейді Вероника.
Алматы қаласының тұрғыны Қарлығаш Алтаева бұл вакцинаны көптен бері күтіп жүргенін айтады.
«Мен бұл вакцинаны көптен бері күтіп жүрмін, ол жүкті әйелдерге жасалады. Вакцина келгені белгілі болғаннан кейін олар мені шақырды, бірінші компонентті алдым. Өткен жылы мен COVID-19 ауруымен ауырдым және оның қаншалықты қиын екенін білемін. Менің айналамның бәрі вакцинация алғандар», - дейді ол.
№4 Қалалық емхана бас дәрігерінің орынбасары Сәуле Мадьярова соңғы екі аптада емханада Pfizer вакцинасы туралы түсіндіру жұмыстары жүргізілгенін айтады.
«№4 емхана 12 мен 17 жас аралығындағы 4540 бала оқитын 10 мектепке қызмет көрсетеді. Ертең біздің дәрігерлер, яғни эпидемиологтар, салауатты өмір салтын ұстанатын дәрігерлер, жалпы тәжірибелік дәрігерлер мектеп оқушыларының ата-аналарына онлайн семинарлар өткізеді. Бүгінде бала емізетін әйелдер, жүкті әйелдер, колледж студенттері, жоғары оқу орындары, сонымен қатар студенттер екпе алды. Бүгінгі таңда вакцинаға 40 бала емізетін анадан, 29 жүкті әйелдерден, 38 мектеп оқушыларының ата-аналарынан келісім алынды», - дейді Мадьярова.