Алматыдағы базарда түнде шыққан өрт дер кезінде сөндірілді, - деп хабарлайды Aqshamnews.kz.
Алматыда кеше түнгі уақытта сауда нүктелерінің бірінде өрт шықты. Оқиға Алатау ауданындағы "Солтүстік айналым" ықшамауданында орналасқан сауда базарында болған. Бұл туралы ҚР ТЖМ мәлімдеді.
Ведомствоның хабарлауынша, өрт алдымен бір қабатты жылдам тамақтану орнында басталып, кейін жанындағы металл контейнерге тараған.
"Алғашқы өрт сөндіру бөлімшелері келген кезде жалын дүңгіршікке жайылып, көрші құрылыстарға таралу қаупі болған. Өртсөндірушілердің үйлесімді әрі жедел әрекетінің арқасында от 50 шаршы метр аумақта толықтай сөндірілді", – деді ТЖМ өкілдері.
Өрт сөндіру кезінде мамандар екі газ баллонын шығарып, жарылыстың алдын алған. Абырой болғанда, зардап шеккендер жоқ.
Қазіргі уақытта өрттің шығу себебі анықталып жатыр.