Алматыда «AMANAT» партиясының АҚФ Әйелдер қанаты мен қалалық Қоғамдық кеңестің ұйымдастыруымен диалог алаңы өтті. Шараның басты тақырыбы – буллинг пен тұрмыстық зорлық-зомбылыққа ұшыраған балаларға кәсіби психологиялық көмек көрсету мәселесі, деп хабарлайды aqshamnews.kz
Алатау және Наурызбай аудандарында өткен жиынға қоғамның қауіпсіздігін қамтамасыз ету және балаларға қажетті қолдау көрсету мақсатында мамандар, депутаттар, қоғам қайраткерлері қатысты. Модератор ретінде Алматы қаласы мәслихатының депутаты әрі балалар құқықтары жөніндегі уәкіл Диана Ерлан болды. Ол мектептерде педагог-психологтардың жетіспеушілігін айтып, келесі жылы 200 маманды қосу жоспарланғанын хабарлады.
Психикалық сауықтыру орталығының директоры Сапар Құттыбайұлы Рахменшиев сенім телефонына түсетін қоңыраулардың 18%-ының суицидалды ойларға қатысты екенін атап өтті. Бұл дерек кәсіби психологиялық көмектің қажеттілігін көрсетеді. Диана Ерлан балалар арасындағы суицид жағдайларының статистикасын бөлісті:
- 2021 жылы – 13 аяқталған жағдай, 33 әрекет;
- 2022 жылы – 14 аяқталған жағдай, 17 әрекет;
- 2023 жылы – 9 аяқталған жағдай, 35 әрекет;
- 2024 жылдың алғашқы 9 айында – 13 аяқталған жағдай, 37 әрекет.
Өз-өзіне қол жұмсау көрсеткішінің өсуі барлық мүдделі тараптардың үйлесімді жұмыс істеу қажеттілігін көрсетеді. Кездесу барысында ата-аналар мен мұғалімдердің балалардағы алаңдаушылық белгілерін байқаудағы рөліне ерекше назар аударылды. Психиатр отбасылық құндылықтардың, бірлесіп түскі және кешкі ас ішу дәстүрлерінің жоғалып бара жатқанын, соның әсерінен ересектердің балалардағы алаңдаушылық белгілерін байқамайтынын айтты. Ол балалардың өмірдің қиындықтарын сенімді түрде жеңуі үшін қолдау мен мақтау қажеттігін атап өтті.
Сонымен қатар, мектеп психологтарына өз тәжірибелерінде кездесетін қиындықтарды талқылауға мүмкіндік беріліп, оларға маңызды сұрақтарына жауап алу мүмкіндігі ұсынылды.
