1 маусым күні Алматыда Балаларды қорғау күніне арналған ауқымды BALA FEST – 2026 қалалық фестивалі өтеді, деп хабарлайды Aqshamnews.kz тілшісі.
Мерекелік шара Әлия Молдағұлова мен Мәншүк Мәметова атындағы мемориалдық скверде ұйымдастырылады. Фестиваль балаларды ғылым, шығармашылық, спорт, жасанды интеллект және заманауи технологиялар әлемімен таныстыруға бағытталған.
Әр қатысушыға Bala QR атты жеке маршруттық паспорт беріледі. Балалар тақырыптық аймақтардан өтіп, түрлі тапсырмалар орындайды, Bala Coins жинап, интерактивті форматта жаңа бағыттарды зерттейді.
Фестиваль бағдарламасында робототехника, ғылыми эксперименттер, digital-art, киберспорт, шеберлік сабақтары, спорттық белсенділіктер, фотозоналар, сыйлықтар және үлкен концерттік бағдарлама бар.
Басты сахнада музыкалық хедлайнер ретінде «Альфа» тобы өнер көрсетеді.
Іс-шара 1 маусым күні сағат 12:00-ден 16:00-ге дейін өтеді. Өтетін орны: Әлия Молдағұлова мен Мәншүк Мәметова атындағы мемориалдық сквер, Төле би көшесі мен Абылай хан даңғылының қиылысы.