«Ел ертеңі» қоғамдық қоры алматылықтарды тәуелсіз бақылаушы болуға шақырады.
Алматыда «Ел ертеңі» қоғамдық қорының ұйымдастыруымен баспасөз конференциясы өтті. Онда ұйым мүшелері ел азаматтарын, әсіресе, жастарды өздерінің белсенділіктерін көрсетіп, алдағы Мәжіліс сайлауында бақылаушы болуға шақырды, деп хабарлайды Аlmaty-akshamy.kz
- «Алдағы сайлауда бақылаушы болуға өз ұйымымызға адамдарды жинайын деп жатырмыз. 18 жастан асқан кез келген Қазақстан азаматы біздің ұйымға келіп, бақылаушы ретінде қосыла алады. Біздің мақсатымыз – алдағы сайлаудың әділ өтуін қамтамасыз ету. Өткен Президент сайлауында өзім де бақылаушы болып қатыстым. Енді осы сайлауға біздің ұйымның атынан алғаш рет барайын деп отырған жас бақылаушыларға өз тәжірибемді бөлісемін», - деді «Ел ертеңі» ұйымының мүшесі, жас мұғалім Сұлтан Айтбаев.
- «Ел ертеңі» ұйымы бұған дейін де сайлауларға атсалысқан болатын. Енді еліміздің жас азаматы, белсенді ретінде алдағы Мәжіліс пен мәслихат сайлауында да өз үлесімізді қосқымыз келіп отыр. Сайлау учаскелерінде білместіктен әртүрлі мәселелер туындап жатады. Біз осындай жағдайлардың алдын алғымыз келеді. Біздің ұйымға жүгінген жастарды алдағы уақытта арнайы оқытамыз. Сайлаудың өзінің ережелері бар. Біз сол ережелерді және барлық талап-міндеттерді таныстырып, құқықбұзушылықтың алдын алуға жұмыс істейтін боламыз. Сонымен қатар, ұйымға қосылған әр азаматқа куәландыратын куәлік береміз», – деді «Ел ертеңі» ұйымының белсендісі, Phd маман Байзақ Мақсат.
«Біздің ұйым Президент сайлауы кезінде Алматының 8 ауданы бойынша барлық сайлау учаскелерін қамтыды. Бұл жолы да қаламыздың 500-ден астам ашық сайлау учаскелеріне кемі бір бақылаушыдан жіберуді жоспарлап отырмыз. Біз ұйымға қабылдауды әлі бастамасақ та, өткен сайлауда қатысып, осы жолы да бақылаушы боламын деп жатқан жастар көп», – дейді ұйым белсендісі Дидар Құрман.