Кеше Алматы қаласында қоғамдық көлікте орын алған оқиға қоғамды дүрліктірді. Автобуста әйелге қатысты болған видеосы әлеуметтік желілерде кеңінен таралды. 66 жастағы ер адам әйелдің телефонмен қатты сөйлегеніне ашуланып, оны ұрып-соққан, деп хабарлайды aqshamnews.kz
Оқиға Алматы қаласының қоғамдық көліктерінің бірінде болған. Ер адам әйелдің телефонмен қатты сөйлеп тұрғанын естіп, оған наразылық білдіріп, сөзбен түсіндіруге тырысқан. Алайда ол әйелдің қатты сөйлегеніне төзе алмай, күш қолданған. Бұл жағдай қоғамдық көлікке мінген басқа жолаушылардың көз алдында болғандықтан, оқиға бірден назарға ілікті.
Бұл жайт бойынша құқық қорғау органдары жедел әрекет етіп, 66 жастағы ер адамды ұстап, уақытша ұстау изоляторына қамады. Алматы қаласы Алмалы ауданы ішкі істер бөлімі бастығының орынбасары Батуржан Абдумасаров мәлімдегендей, күдіктіге қатысты қылмыстық іс қозғалып, тергеу жұмыстары басталды. Бұзақылық әрекет жасаған азамат жауапқа тартылады.