Мамандардың мәліметінше, бұл құбылыс бірқатар метеорологиялық фактордың тоғысуымен байланысты, деп хабарлайды aqshamnews.kz
Синоптиктердің хабарлауыша, 1 шілде күні еліміздің үш қаласында атмосферада ластаушы заттардың жоғары мөлшерде жиналуы күтіледі. Олар атмосфераның төменгі қабатында зиянды қоспалардың жиналып, таралмай қалуына себеп болады.
«2025 жылғы 1 шілдеде Алматы, Ақтөбе қалаларында және түнде Астана қаласында қолайсыз метеорологиялық жағдайлар күтіледі», – делінген ресми хабарламада.
Қолайсыз метеожағдайлар – бұл ауаның ластануына әкелетін табиғи құбылыстар. Оларға мыналар жатады:
тымық ауа райы;
баяу соғатын жел;
тұман;
температуралық инверсия (жер бетіне жақын ауа қабатының жылырақ болуы).
Бұл құбылыстар зиянды заттардың ауада таралуына кедергі келтіріп, олардың шоғырлануына жол ашады. Әсіресе, бұл тығыз салынған тұрғын аудандар мен өнеркәсіптік аймақтарда байқалады.
Қауіп неде?
Ауа сапасының уақытша нашарлауы тыныс алу органдарына кері әсер етіп, әсіресе балалар, қарттар және созылмалы ауруы бар адамдар үшін қауіпті болуы мүмкін. Осындай күндері ашық ауада ұзақ уақыт болудан аулақ болған жөн, әсіресе таңғы және кешкі уақыттарда.