Бостандық ауданының қорғаныс істері жөніндегі басқармасы мен ардагерлер кеңесінің өкілдері Ұлы Отан соғысының ардагері Анатолий Назарович Поповты 99 жасқа толған туған күнімен құттықтады.
Анатолий Попов 1926 жылы 13 қаңтарда Алматы облысы Қаскелең қаласында дүниеге келген. Әскери байланысшы мамандығын алған соң 1943 жылы Балтық майданына жіберіледі.
Анатолий Назарович «Риганы азат еткені үшін», «Германияны жеңгені үшін» медальдарымен және басқа да мерейтойлық наградалармен марапатталған.
Жеңістен соң Анатолий Назарович әскер қатарында қалып, қызметін жалғастырды. 1952 жылы Саратов әскери медициналық училищесіне оқуға түседі. Содан кейін Германияда қызмет етті.
1955 жылы Отанына оралып, 30 жылдан астам қалалық санитарлық-эпидемиологиялық станцияда жұмыс істеді. Жұбайы Тамара екеуі үш қыз тәрбиелеп өсірді. Ардагер олардан төрт немере, алты шөбере сүйіп отыр.
Әскери қызметшілер майдангерге жергілікті әскери басқару органдары қолбасшылығының құттықтауы мен сыйлықтарын табыс етті. Олар Анатолий Назаровичке Жеңіске қосқан үлесі үшін зор алғыс білдіріп, зор денсаулық және ұзақ ғұмыр тіледі.