Алматы, Алматы және Жетісу облыстарынан әскери міндеттілер қатысатын кезекті әскери жиындар Радиоэлектроника және байланыс әскери-инженерлік институтының оқу орталығында өтіп жатыр. Жиынға барлығы 120-ға жуық адам шақырылып, олар бір ай ішінде 15 әскери мамандықты меңгеретін болады, деп хабарлайды aqshamnews.kz
Жиынның негізгі мақсаты – әскери дайындықты арттыру және қорғаныс күштеріне қажетті әскери маманданған кадрларды даярлау. Сондай-ақ, әскери-оқытылған мамандардың резервін қалыптастыру көзделген. Бұл туралы оқу орнының бастығы, генерал-майор Қайрат Даутов атап өтті:
– Жиынның мақсаты – елдің қауіпсіздігі мен қорғаныс қабілеттілігін қамтамасыз ету үшін кадрлық ресурстарды дайындау және толықтыру, – деді ол.
Бір ай ішінде қатысушылар өздерінің әскери мамандықтары бойынша теориялық және практикалық дайындықтан өтеді. Дәрістер мен тәжірибелік сабақтарды әскери оқу орнының профессор-оқытушылары жүргізеді. Әсіресе, практикалық сабақтарға ерекше көңіл бөлініп, қатысушылардың кәсіби шеберлігін арттыруға мүмкіндік береді.
Жиынға қатысушылардың бірі – Халық Қаһарманы, Кеңес Одағының Батыры Мурдин Тәліповтің немересі Яшар Полотов. Ол ата жолын қуып, ел қорғауға әрдайым дайын екенін жеткізді:
– Мен әскери институттың әскери кафедрасында мотожаяу әскер взводының командирі мамандығы бойынша оқыған едім, сол уақыттан бері 21 жыл өтті. Қазір С-300 радиолокациялық барлау кешенінің басшысы ретінде дайындықтан өтіп жатырмын. Жиынға шақырылғаныма қуаныштымын, өйткені бұл менің қабілеттерімді шыңдап қана қоймай, жаңа дағдыларды үйренуге мүмкіндік береді, – деді Полотов.
Әскери міндеттілердің барлығы әскери оқу орны полигонында орналасқан шатырлы қалашықта тұрып жатыр, оларға тамақтану және қажетті жабдықтармен қамтамасыз ету ұйымдастырылған. Жиын соңында әрбір қатысушы сынақ тапсырып, оның нәтижесі бойынша әскери жиыннан өткенін растайтын сертификат және жеке мінездеме алады. Осы құжаттар негізінде жергілікті әскери басқару органдары оларға кезекті әскери шен беру туралы шешім қабылдайды.
Айта кетейік, Радиоэлектроника және байланыс әскери-инженерлік институты 2018 жылдан бастап әскери міндеттілер үшін жиындар өткізіп келеді. Осы уақыт ішінде Қазақстан Республикасының Әуе қорғаныс күштеріне 600-ге жуық маман даярланған.