Алматыда «Таза Қазақстан» жалпы республикалық акциясы және «Алматы – біздің ортақ үйіміз» науқанын жалғастыру аясында жазғы уақытта «Алматы Жазы» акциясы басталды, деп хабарлайды almaty-akshamy.kz
26 маусым мен 6 шілде аралығында өтетін «Алматы Жазы» акциясы барысында санитарлық мақсатта 6 мыңға жуық ағашты кесу жоспарланып отыр. Бұл шараның басты мақсаты – апатты жағдайдағы ағаштарды санитарлық мақсатта кесу арқылы қала тұрғындарының қауіпсіздігін қамтамасыз ету.
Ағаштарды санитарлық мақсатта кесу уақытылы жүргізілмесе, адамға және мүлікке зиян келуі мүмкін. Осыған байланысты ауру және қураған ағаштарды кесу қатты жел мен нөсер кезінде бұтақтардың құлау қаупін азайтады. Акция барысында қауіпті еңісте өскен ауру және қураған ағаштарды кесу қарастырылған.
Кесілген ағаштардың орнына 10 есе көп мөлшерде көшет отырғызылады. Бұл Алматы қаласы әкімдігінің ерекше бақылауында, және қаладағы жасыл желекті сақтау мен көбейтуге бағытталған маңызды шара болып табылады.
«Алматы Жазы» іс-шарасы Мемлекет басшысының тапсырмасымен жүзеге асырылып жатқан елді мекендердің аумағын абаттандыру мен көгалдандыруға бағытталған «Таза Қазақстан» республикалық акциясы аясында өтуде. Бұл науқан адамдардың қоршаған ортаға ұқыпты қарауын қалыптастыруға, халық арасында жоғары азаматтық жауапкершілікке тәрбиелеуге, экологиялық мәдениетті арттыруға арналған.