Биыл кәсіби додаға қатысуға 984 педагог өтінім беріп, олардың арасынан 11 үздік мұғалім финалға жолдама алды, – деп хабарлайды aqshamnews.kz тілшісі.
Бүгін Алматыда жас педагогтер арасында өтетін «Almaty Ustazy» қалалық байқауының финалдық кезеңі өтті.
Қатысушылар «Мен – көшбасшы мұғаліммін» тақырыбындағы авторлық жобаларын көпшілік алдында қорғап, өздерінің білім беру тұжырымдамалары мен педагогикалық идеяларын таныстырды. Сондай-ақ «Ашық мінбер» алаңында қазылар алқасы мен көрермендердің, педагогикалық еңбек ардагерлері мен оқушылардың сұрақтарына жауап берді.
«Almaty Ustazy» байқауы Алматыда алтыншы жыл қатарынан өткізіліп келеді. Осы уақыт ішінде оған 36 жасқа дейінгі 10 мыңға жуық жас педагог қатысқан. Байқаудың мақсаты – талантты әрі креативті ұстаздарды анықтау, озық педагогикалық тәжірибені тарату және мұғалім мамандығының беделін арттыру.
Биыл байқау бірнеше кезеңнен тұрды. Алғашқы кезеңде педагогтер 11 пән бойынша тестілеуден өтті, жұмыстарды 33 сарапшы бағалады. Келесі кезеңге өткен 71 педагог Алматының алты мектебінде ашық сабақтар өткізіп, нәтижесінде 11 үздік қатысушы финалға шықты.
Финал қорытындысы бойынша М. Ганди атындағы №92 мамандандырылған лицейдің химия пәні мұғалімі Мықтыбек Таңірберген Бақытжанұлы «Almaty Ustazy» қалалық байқауының Гран-при иегері атанды. Оған 5 миллион теңге көлемінде ақшалай сыйлық табысталып, сондай-ақ халықаралық білім беру тағылымдамасына қатысу мүмкіндігі берілді. Сонымен қатар жеңімпаз 6 педагог шетелдік тағылымдамадан өту мүмкіндігіне ие болды.
Жеңімпаздарды салтанатты марапаттау рәсімі Мұғалімдер күніне орай Республика сарайында өтеді.
«Almaty Ustazy» – жас мұғалімдердің кәсіби әлеуетін ашып, жаңа педагогикалық идеялар мен заманауи білім беру тәжірибелерін қолдауға бағытталған маңызды қалалық алаң.