Алматыда 16 наурыз – Мәдениет және ұлттық салт-дәстүр күніне орай, алғаш рет «Nomadic Art: Дала мәдениетінің жаһандық бейнесі» атты халықаралық фестиваль және ғылыми-практикалық конференция өтті, – деп хабарлайды aqshamnews.kz тілшісі.
Фестиваль аясында «Ұлттық мұра – ұрпаққа аманат: музей жәдігерлері мен этнодизайнның тоғысуы» тақырыбында ғылыми-практикалық конференция, отандық және шетелдік дизайнерлердің этноколлекциялар шеруі, қолөнер шеберлерінің халықаралық көрмесі, көне технологияларды жаңғырту бойынша шеберлік сабақтар ұйымдастырылды.
Жоба көшпелілер мәдениетін насихаттауға, заманауи этнодизайнды дамытуға және халықаралық шығармашылық байланыстарды нығайтуға бағытталды. Аталмыш фестиваль музей мұрасын, ұлттық қолөнер мен сән әлемін және заманауи креативті индустрияны тоғыстырды.
Іс-шара барысында Дүниежүзілік қолөнер қалаларының World Craft Cities желісіне кіретін Тараз, Түркістан және Алматы қалаларының таныстырылымына ерекше назар аударылды.
Қонақтарға этнографиялық көрме, көне жәдігерлер мен заманауи суретшілердің авторлық инсталляциялары, киіз басу, керамика және зергерлік бұйымдар жасау әдістері ұсынылды.
Фестиваль аясында WCC сарапшыларымен B2B кездесулер өтіп, Орталық Азия қолөнершілерін халықаралық нарыққа шығару бойынша стратегиялық келісімдерге қол қойылды.