Алматы қаласының Білім басқармасы мемлекеттік білім беру ұйымдарындағы бос басшылық лауазымдарға үміткерлерді конкурстық іріктеуді жаңа, ашық форматта өткізді, – деп хабарлайды aqshamnews.kz тілшісі.
Іріктеу процесі қала тарихында бірінші рет тікелей эфирде көрсетіліп, кез келген адамға конкурстық комиссия отырысын нақты уақыт режимінде бақылауға мүмкіндік алды.
12 наурыз күні өткен комиссия отырысы Білім басқармасының Instagram-дағы ресми парақшасы арқылы көрсетілді. Бастама білім беру саласындағы мемлекеттік басқару бағытындағы ашықтық қағидаттарын қамтамасыз ету жолындағы маңызды қадам болды.
Конкурстық комиссия құрамына мемлекеттік органдар өкілдері, қоғам қайраткерлері, сонымен қатар педагогика және білім беру менеджменті саласындағы тәуелсіз сарапшылар кірді. Ашық сұхбат барысында үміткерлер білім беру ұйымдарын дамытуға қатысты өз көзқарастарын ұсынып, басқарушылық және кәсіби құзыреттері бойынша бағаланды.
Іріктеудің жаңа форматы рәсімнің ашықтығын қамтамасыз етіп, шешімді жабық түрде қабылдау мүмкіндігіне жол бермеуге бағытталды. Тікелей эфир кәсіби қауымдастық пен жалпы жұртшылық тарапынан қызығушылық тудырып, білім беру жүйесіндегі басқарушылық кадрлық резерв қалай қалыптасатынын бақылауға жол ашты.