Оқушылар сарайында «Қазақстандағы балалар үйлері түлектерінің қауымдастығы» заңды тұлғалар бірлестігі мен қалалық Білім басқармасының ұйымдастыруымен әлеуметтік мекемелерде тәрбиеленіп жатқан балаларға арналған мерекелік іс-шара өтті. Оған Алматы қаласының әртүрлі әлеуметтік мекемелерінен келген 400-ден астам бала қатысты. Олардың қатарында «Мейірім», «Жанұя» балалар орталықтары, SOS балалар ауылы және «Бағанашыл» балалар үйінің тәрбиеленушілері бар. Жаңа жылдық шырша биыл тоғызыншы рет өткізіліп отыр.
Қазір бұл іс-шара ата-ананың қамқорлығынсыз қалған балалар үшін жыл сайын асыға күтетін маңызды мерекеге айналды. Өйткені, мұнда концерттік қойылымдар, ойын-сауық бағдарламалары ұйымдастырылып, барлық балаға жаңа жылдық сыйлықтар табысталды. Ұйымдастырушылардың айтуынша, іс-шараның өтуіне Алматы қаласының Қоғамдық кеңесі, сондай-ақ халықаралық ұйым өкілдері де қолдау көрсеткен.
«Бұл жаңа жылдық шырша – әлеуметтік мекемелерде тәрбиеленіп жатқан балалардың асыға күтетін мерекелерінің бірі. Бір-бірімен еркін араласып, шат-шадыман көңіл күйде мерекені атап өтеді», – деді Алматы қаласы Білім басқармасы басшысының орынбасары Бибігүл Төлепбергенова.
«Мен Жаңа жыл мен Наурызды өте жақсы көремін. Бүгін бәрі қатты ұнады. Әсіресе, үлкен әрі әдемі шырша мен сыйлықтар керемет болды», – деп «Бағанашыл» балалар ауылынан келген Ажар Кенганова әсерін бөлісті.