Іс-шара кепілдік беру жүйесін екі жылда бір рет өткізетін шара.
Мегополисте «Туристік Қамқор» қоры ұйымдастырған кеңейтілген конференция өтті, деп хабарлайды Almaty-akshamy.kz.
Іс-шарада өнімдерді әртараптандыруға, сондай-ақ туроператорлар мен туристік агенттіктерге арналған «tourcode.kz» әлеуметтік жобасының таныстырылымы өтті. Сондай-ақ, туризм саласында еселі еңбек атқарып жүрген жандарды, компания қызметкерлерін Алғыс хаттармен марапаттады.
«Іс-шара кепілдік беру жүйесін екі жылда бір рет өткізетін шара. Бұл жерде біздер қордың осы уақытқа дейін атқарған қызметтері, туризм саласында қандай жаңалықтар бар екендігі, туристік заңнамада қандай өзгерістер болғандығы жайлы атап өтеміз. Қуантарлық жаңалықтардың бірі «tourcode.kz» порталының ашылуы. Ол жерде барлық туристік агенттіктер жайлы мағлұмат ұсынылады. Ішкі туризм, сыртқы туризмнің мәліметтері бар. Енді шетелде, елімізде демалуды жоспарлап жүрген азаматтарымыз еш қиналмайтын болады», – дейді «Туристік Қамқор» қорының директоры Асылхан Есілов.
Осы ретте ақпараттық порталдың туроператорлар мен турагенттіктердің сауаттылығын арттыруға бағытталған, сондай-ақ шетелге шығатын Қазақстан Республикасының азаматы үшін жолсерік болып табылатын әлеуметтік жоба ретінде құрылғанын ерекше атап өткеніміз жөн.
«Бүгінгі жиынымыз қазақстандықтардың сыртқы туризмі бойынша, солардың құқығын кепілдендіру жүйесі бойынша өткізіліп отыр. Ол жүйе 2016 жылдан бастап енгізілген. Бұл жүйе пандемия кезінде өзінің тиімділігін көрсетті. Ол кезде шетелде 6 мыңдай турист қалып қойды. Көптеген аэропорт жұмыс істемей, кей ұшақтар қабылдамай қойған еді. Сол кезде жүйе бюджеттен ешқандай қаражат алмай-ақ туристердің елге оралуларына көмек көрсеткен болатын. Осы секілді мәселелер мен алдағы уақытта атқарылатын жұмыстар жиында талқыланды. Сондай-ақ, туристерге қолайлы болу мақсатында келеңсіз жайттардың алдын алу керектігі айтылды», – дейді ҚР Мәдениет және спорт министрлігінің Туризм индустриясы комитетінің төрағасы Дастан Рыспеков.
Аталмыш қордың бүкіл қызметін бүге-шігесіне дейін интернет кеңістігінде, яғни www.fondhamkor.kz сайты арқылы оқып-білуге болады. Ондағы ақпараттар турагент, туроператор және туристке қолжетімді. Сайтта туристерге әлдебір төтенше жағдайға тап болғанда, қайда, кімге жолығуы керектігі, «Туристік Қамқор» қорына қандай деректер беруі керектігі айтылған. Бұдан кейін жүйе әкімшілігінің жұмысы басталып, ол шұғыл кеңес шақырып, туриске ауыртпалық түсірмей, жағдай жасау әрекеттеріне көшуге шешім қабылдайды.
